Santa Cruz – Diasabra marduga pasa di 1’or polis di Sta Cruz bay direccion di e bocht peligroso na Santa Cruz prome cu bo yega e panaderia.
Eynan un accidente entre 3 auto a sosode.
Mesora na yegada di e patruya nan a tuma nota cu un di e chauffeurnan tawata bou influencia. Agentenan a bay over na lage supla; unda cu esaki a pasa e limite stipula pa ley y aki a bay over na detencion y despues transporta pa warda di polis.
E autonan envolvi tawata un Toyota, un Honda y un Nissan March.
E Nissan March tawata wordo maneha pa e chauffeur burachi, cu tawata biniendo di Piedra Plat pa Santa Cruz.
Debi cu e tawata manehando auto bou influencia e ta topa cu e Honda y e Toyota bayendo direccion Piedra Plat; y ta dal contranan.
Ambulance tambe a presenta, pa controla un di esnan cu tawata envolvi pero no tawata nada particular.
Caminda mester a wordo cera ambos banda, esta e crusada di Piedra Plat cu ta bay pa Sero Pita.
E bocht unda e accidente a sosode ta un sitio cu semper mester pone bon atencion; paso si tawata un vehiculo mas grandi y cu velocidad halto e uitkomst di e accidente ta cambia.
