Home » Scouting Aruba ta celebra Dia di San Jorge

Scouting Aruba ta celebra Dia di San Jorge

by Admin
0 comment 121 views

 

Anualmente e movemento scout ta celebra y conmemora Dia di San Jorge (Sint Joris Dag).
Esaki ta tuma luga riba 23 di april. E aña aki Scouting Aruba lo tene un evento grandi dia 22 di april pa celebra e dia tan special aki den mundo di scouting caminda nos lo conta cu participacion di mas di 350 miembro compaña pa nan miembronan di famia.
Nos evento lo tuma luga diasabra awor di 5:00 pa 8:30 pm den Carnival Village na San Nicolas. Entre 6:15 pa 7:00 pm nos lo tene un desfile den e cayanan di San Nicolas. Pueblo di Aruba y specialmente di bario di San Nicolas ta invita pa presencia e evento aki.

Riba dia di San Jorge nos ta recorda e gran guerero cu a bringa contra maldad y persecucion di ciudadanonan inocente pa motibo di nan fe y creencia. Tambe nos ta uza e moraleha di e leyenda caminda cu San Jorge a mata e dragon caminda nos ta educa nos scoutnan pa semper lucha pa locual ta bon y husto. Semper pone bo dilanti pa ta honesto, responsabel, noble, cumpli cu bo debernan civico y tene bo mes na compromisonan haci den tur cos cu bo dicidi pa haci. Tur esakinan como caracteristicanan di San Jorge como e gran guerero pa su pueblo.

Nos fundado di scouting a scoge San Jorge como e patrono di tur scout meramente door di e cualidadnan ariba menciona. Esaki ta hustamente locual nos fundado a mira como lo necesario pa tur scout pone bista riba dje. Pa nunca rindi den bida, pone bo metanan bo dilanti y traha pa logra nan, yuda bo prohimo, haci lo corecto y semper cu confiansa den bo mesun habilidadnan.
Riba dia di San Jorge nos tur como scout esta: bever, welp, verkenner, explorer, voortrekker, lider, colaborado y comisario ta renoba nos promesa haci dia nos a instala y tuma e compromiso pa crea un mundo miho, cu paz y husticia. Di awor caba nos ta desea un feliz dia di San Jorge na tur nos miembresia nacional na Aruba, ruman scout y guia na Aruba y tur demas scouts rond mundo. Celebra cu hopi honor y orguyo nos dia tan special!

Scouting Aruba ta e asociacion nacional cu ta coordina diesdos grupo scout local rond di Aruba cu ta consisti di 500 miembro actualmente. Funda desde 23 di April 2000 actualmente cu 23 aña dirigiendo e movemento na bienestar di nos pais Aruba. E movemento scout na Aruba ta existi pa mas di 92 aña caba y cu bista riba futuro lo sigui brinda scouting di calidad na nos isla basa riba su plan strategico y lidernan cu compromiso y responsabilidad pa guia nos miembronan.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio