ORANJESTAD – Awe merdia Corte di Husticia a dicta sentencia den e caso penal cu Ministerio Publico a cuminsa contra e rumannan Williams, N.W.(33) y D.A.W.(34), e yiu di Promer Minister, K.W.(27) y e swa T.M.(22).
ARUBA NATIVE por a compronde cu K.W. no a presenta y T.M. na Hulanda no tabata via video conference. Hues a haya henter e grupo culpabel di violencia publico.
SENTENCIA
Ayera K.W. no a presenta mientras cu T.M. ta na Hulanda. Ta solamente N.W. y D.A.W. Hues a bisa cu el a represa e imagennan di video di seguridad y declaracion di e trahadornan di restaurant Asia un biaha mas. El a bisa cu e acusacion contra e 4 sospechosonan ta violencia publico. Pero N.W. y K.W. tambe ta wordo acusa di a destrui, glasnan, lampinan y stoel.
VIOLENCIA PUBLICO
Hues a duna un splica interesante riba violencia publico. Ki ora un persona por wordo condena pa violencia publico? Segun Corte Supremo, solamente ora e persona su accion ta contribui pa violencia publico. Hues a bisa cu aki no ta conta solamente accion, sino e papia y participacion. Hues ta haya cu mester proba cu daño a wordo haci. Suficiente ta cu e violencia por causa daño. Tambe ta conta si a lanta un obheto pa dal hende cun’e. Hues ta haya legalmente proba cu tur cuater a comete violencia publico.
Hues a mustra cu T.M. a tira un glas riba N.W. E no a coy un boter. N.W. a dal K.W. mokete den cara y ora a sali, a coy boter y glas tira den direccion di grupo di K.W. D.A.W. a tira un glas. K.W. a tira un stoel den direccion di N.W.
RECHAZA DEFENSA PROPIO
Hues a bisa cu abogado di K.W. a bisa cu K.W. a actua den defensa propio pasobra N.W. kier tira glas riba dje. Hues a rechaza esaki. Hues a splica cu ora N.W. a dal K.W., ta un atake y e momento ey K.W. por a defende su mes. K.W. a cay abao den VIP section y a surgi un pelea entre amigonan di K.W. y N.W.
N.W. y D.A.W. a sali for di VIP section, K.W. a sali y bay tras di N.W. N.W. a coy un glas y saca man pa wanta K.W. riba un distancia. K.W. a sigui cana su tras. Trahador di ASIA a bay para entre nan. Na opinion di Hues, envez di bay bek VIP section, K.W. a coy un stoel. E ora ey N.W. a tira un glas y e ora ey K.W. a tira un stoel.
Hues ta haya cu no tabata necesario pa K.W. cana tras di N.W. y tampoco tira stoel. El a rechaza tambe e ponencia di defensa propio di T.M. Hues ta haya cu no tabatin necesidad di tira glas.
DESTRUI COSNAN
Hues a bisa cu Fiscal ta acusa N.W., D.A.W. y K.W. di a kibra cosnan den restaurant. Na opinion di Hues, no tin prueba cu e glas cu D.A.W. a tira a kibra. No por prueba cu K.W. a causa destruccion. N.W. tampoco por prueba cu a causa destruccion. Hues a bisa cu tin prueba cu N.W. a kibra un lampi den e bar di e restaurant.
HERIDA KOKI
Hues a bisa cu e Koki a bay tene N.W. y net T.M. a tira glas riba N.W. E glas a dal den man di e koki kende a sufri corta hundo na su man caminda na hospital mester a haci 22 cosi na e man. Hues a bisa cu esey ta wordo considera herida severo. El a bisa cu e abogado di T.M. a bisa cu T.M. no tira cu boter, siendo cu e koki ta bisa cu el a wordo gedal cu un boter. Hues a rechaza e ponencia di abogado cu ta un otro hende a tira e boter. Hues ta haya cu loke T.M. a tira a causa herida na koki.
VIOLENCIA PUBLICO POR PERHUDICA TURISMO
Pa cu e castigo, Hues a mustra cu e violencia publico a sosode den un restaurant luhoso caminda tabatin hopi turista cu mucha. N.W. y D.A.W. ta drenta den e lugar unda K.W. y amigonan ta disfruta. E lugar tabata trankil. N.W. sin ningun motibo a dal K.W. y lag’e cay abao. A surgi pelea cu a sigui cu tiramento di glas y boter. Turistanan tur spanta, a lanta core bay. A causa chaos total. Hues a bisa cu turistanan a bay sin paga cuenta.
Na opinion di Hues, violencia asina ta trece sentimento di inseguridad den comunidad y serca turista. Esaki ta causa un mal imagen na turismo. Hues a bisa cu turista mester por sinti trankil pa bay come na restaurant.
El a mustra cu N.W. na 2017 caba a haya condena pa violencia. Tambe Hues a tene cuenta cu N.W. no a demostra cu e ta realisa cu loke el a haci no ta bon. Ta N.W. a causa tur e problema. Na opinion di Hues, D.A.W. tampoco no a realisa cu loke el a haci no ta bon. K.W. no a ocasiona e violencia y tampoco T.M.
CASTIGO
Hues a condena D.A.W. na 2 siman di prison condicional cu 2 aña di prueba, 118 ora di trabao pa comunidad of 60 dia sera si no cumpli.
Hues a condena N.W. na 1 luna di prison condicional cu 2 aña di prueba, 157 ora di trabao pa comunidad of 80 dia sera, si no cumpli.
Hues a condena T.M. na 2 luna di prison condicional y 2 aña di prueba, 170 ora di trabao pa comunidad of 90 dia sera si no cumpli. Hues a ordena T.M. pa paga daño na e koki di 3500 florin y a pone medida di pago.
Hues a condena K.W. na 38 ora di trabao pa comunidad of 20 dia sera si no cumpli.