ORANJESTAD – Diabierna 3 di maart 2023, Juelaima Henriquez a defende su tesis exitosamente y a obtene su titulo di Bachelor of Arts. Juelaima a defende su tesis dilanti di e comision di graduacion cu tawata consisti di decano di Facultad di Arte y Ciencia dr. Mieke de Droog, sra. Birgit Kreykenbohm y Director di Arubus N.V. sr. Edwin Mohamed. Ademas tabata presente famia di Juelaima, invitadonan y otro docentenan di Universidad di Aruba.
E titulo di Juelaima su tesis ta “SWOT Analysis of The Public Bus Transportation Arubus N.V.” Juelaima a investiga e transporte di Aruba, Arubus N.V a base di analisis ‘SWOT’ (strengths, weaknesses, opportunities, threats).
Juelaima su motivacion pa cu e topico aki ta e hecho cu tin data limita tocante transporte publico na Aruba. Juelaima a observa cu generalmente transporte publico ta diseña na un manera cu no ta beneficia persona cu limitacion (fisico). Tambe transportacion ta un reto pa esnan cu no tin auto como modo di transportacion. Pa e motibo aki e meta di e tesis ta pa explora diferente perspectiva riba e situacion actual y sostenibilidad di transporte publico di Arubus N.V.
Segun resultado di e investigacion, Arubus su puntonan fuerte ta cu e ta comodo, e ta un compania cu ta traha tur dia unda cu e cliente por depende di e servicio cu ta ser provee. Un di e puntonan menciona como debilidad di Arubus ta cu tin recurso limita y cu cada aña costo di personal ta subi. E retonan identifica di Arubus ta cu nan servicionan ta competi cu transporte priva (bus chikito) y auto personal. E strategia menciona door di e participantenan ta pa mehora e servicio pa e ta mas accesibel y inclusivo pa entre otro adulto mayor y persona cu limitacion, por ehempel introduci un servicio pa busca persona cu limitacion y cu ta accesibel via yamada telefonico.
Un di e recomendacion pa gobierno di Aruba ta pa reenforsa comunicacion cu bus chikito y Arubus N.V. en conexion cu mehoracion di infrastructura di Aruba. Un recomendacion pa Arubus ta pa structura e compania, incorpora un plan di mercadeo pa ilustra e importancia cu Arubus tin den nos comunidad y crea servicio inclusivo y sostenibel pa nos comunidad.
Un palabra di gratitud ta bay na: e coleganan di Universidad di Aruba, e docentenan di e departamento di OGM y profesional cu a yuda of guia Juelaima como studiante. Tambe ta gradici tur participante cu a contribui na e investigacion aki y e compania di transporte publico Arubus N.V. y esnan pafo di Universidad di Aruba cu a contribui na un manera of otro na e acontecimento aki.
Pa mas informacion riba e estudio OGM, bishita e website di Universidad di Aruba na http://www.ua.aw/ogm, e pagina di Facebook @UniversityofArubaOGM y e pagina di Instagram @ogm_ua.