Un proyecto musical pa crea conscientisacion pa salud mental y cuido personal na scol secundario.
ORANJESTAD: Diahuebs ultimo, Minister Endy Croes a reuni cu e cantante Sr. Levi Silvanie y Sr. Friso Veenman. Sr. Silvanie ta un artista hopi popular naci na Curaçao y ta residencia na Hulanda. Despues di dies (10) aña Levi ta bolbe cu un album y vision nobo, uzando su musica y storia pa empodera hobennan cu ta sufri den silencio. Na momento cu Minister Endy Croes a ricibi presentacion di proyecto ‘The School Tour’, a duna sosten mesora pa por realisa e proyecto aki pa nos hobennan. Den luna di october proximo, Levi Silvanie ta lansa ‘The School Tour’ na Aruba, un proyecto musical pa crea conscientisacion di salud mental, enfoca riba e hobennan ariba di 15 aña di scol secundario. Minister Endy Croes a indica cu e proyecto ta “sold out” y ta dialogando pa agrega mas sesion. Durante cinco (5) dia alrededor di 100 hoben di scol secundario lo participa den e proyecto aki. Den cada sesion Levi lo conta su propio storia y a traves di musica encurasha e hobennan pa papia di nan problema y busca ayudo tempran pa asina preveni problema di salud mental. Durante e session, e hobennan ta scucha musica y despues ta dialoga di e temanan cu a wordo presenta. E hobennan por expresa y ricibi informacion tocante salud mental y cuido personal. Lo dialoga di e obstaculonan diario y diferente manera cu por mehora y/of mantene un estado mental saludabel. Sr. Silvanie ta añadi cu e ta trahando cu varios organisacion y ekipo di profesional na Aruba pa brinda tur hoben cu ta participa informacion y cuido necesario.
Sr. Silvanie a expresa cu mas o menos tres aña pasa el a sinti cu su proximo proyecto musical mester tin un mision diferente, un mision cu no ta simplemente crea musica pa presenta riba scenario, pero musica cu por yuda otro hende. Sr. Silvanie a sigui bisa, cu despues di e pandemia mundo completo ta deal cu problema di “mental health”. Den nos comunidad tambe, pero na momento cu nos ta tratando cu un comunidad asina chikito, berguensa y miedo por hunga un rol hopi grandi den e manera con un persona ta ‘open up’. Levi kier uza e poder di musica pa empodera y inspira pa inicia combersacion tocante salud mental y cuido personal.
Sr. Silvanie a indica di ta sumante contento di por trece e proyecto musical aki pa e hobennan di Aruba y ta agradicido di por conta cu sosten di Mandatario di Ensñansa. Por ultimo, Minister Endy Croes a enfatisa cu e ta un bunita proyecto, unda cu a traves di musica por yuda e hoben pa combersa di esaki.
