Recientemente Media a duna un comunicado y indicacion cu a consecuencia di mal comunicacion entre departamento nan concerni (DIMAS y Inmigracion Aruba), e evento “Duelo de los Generos” cu artistanan internacional, a ser cancela.
Inmigracion Aruba como autoridad na frontera, kier clarifica cu esaki no ta e caso.
Na yegada na Aruba tur pasahero ta ser controla conforme e rekisitonan menciona den nos leynan di Admision y Expulsion di Aruba (LTU) y e Toelatingsesluit.
E proceso di control ta ser realisa door di verifica e Sistema Radex como tambe a base di e Sistema di DIMAS.
Durante e control tin comunicacion estrecho cu DIMAS, pa asina por tin tur datos concreto. Y cual finalmente a base di tur datos concreto ta tuma e decision adecua y conforme nos leynan di Admision.
Di e forma aki Inmigracion Aruba ta apela, pa evita cualkier inconveniencia pa tur viahero tin e documento nan necesario y cu ta ser rekeri na e yegada na Aruba.