Prome Minister Evelyn Wever Croes y Minister Plenipotenciario Ady Thijsen a reuni cu Presidente saliente, señor Nico van Grieken y Presidente actual señor Marlon Titre di e organisacion na Hulanda Genootschap Nederland-Aruba. E organisacion aki tin como meta pa estrecha lasonan entre Aruba y Hulanda.
Despues di a hiba conbersacionnan hopi informativo cu e representantenan di e organisacion, e mandatarionan a gradici e organisacion pa e trabounan cu nan ta haci diaramente y tambe nan a gradici primordialmente señor Nico van Grieken pa trabounan desplega pa e organisacion y pa Aruba en general. Alabes tambe a desea señor Marlon Titre tur cos bon y exito den su posicion como presidente di e organisacion.
Genootschap Nederland-Aruba ta haci hopi trabounan informativo pa Arubianonan na Hulanda entre otro ta organisa charlanan. Na un encuentro na 2018, Prome Minister a wordo invita pa duna un charla y ainda hopi hende ta referi na e encuentro aki como uno hopi informativo y efectivo.
“E importancia di organisacionnan asina na Hulanda ta grandi pasobra nan por logra estrecha lasonan y crea brugnan entre organisacionnan na Aruba y organisacionnan na Hulanda na un forma mas efectivo. Nos ta gradici Genootschap Nederland-Aruba pa tur trabou cu nan ta haci y nos ta mira riba cooperacionnan mutuo den e periodo nos dilanti”, Prome Minister a remarca.