Diaranson a cuminsa e reunionnan entre Minister President Wever-Croes y Minister Maduro di Finansa hunto cu Secretario di Estado Van Huffelen pa trata e debe cu Aruba a acumula cu Hulanda pa por a surpasa e pandemia. E pandemia tabata tin un efecto grandi pa Aruba su economia y finansa publico y Hulanda a yuda presta Aruba e fondo necesario pa por a cubri nos necesidadnan financiero. Awo cu e periodo a pasa y Aruba ta recuperando, ta yega momento cu mester cuminsa papia riba con ta bay paga e debe aki. Pa esaki ta necesario pa haya sa cual ta bay ta e termino di pago y ki condicion lo tin pa Aruba por paga e debe bek.
For di basta tempo Aruba a bin ta pidi Hulanda pa por cuminsa papia riba e condicionnan di pago di e debe acumula pa surpasa e pandemia. Aruba, contrario na Corsou y Sint Maarten, ta presta placa riba mercado internacional y debe inversionistanan internacional un splicacion riba con ta bay trata cu e debe grandi acumula cu Hulanda. Nan lo kiersa, por ehempel, si e debe aki lo afecta e capacidad di pago di Aruba su debenan riba mercado internacional. Como cu e debe cu Hulanda ta madura na oktober 2023, Aruba kier haya claridad mas pronto posibel di Hulanda. Riba nivel di ambtenaar ya caba a tuma luga algun reunion, pero awo na Den Haag a tuma luga e prome di varios reunion na nivel di mandatario riba e topico aki.
Por bisa cu di banda di Hulanda nan kier mira e plan financiero economico di Aruba pa e tempo cu ta sigui nos dilanti, e FEM 2 cu ta premira di keda cla na luna di juni e aña aki. Hulanda lo kier haya un bista riba, entre otro, e capacidad di pago cu Aruba ta bay tin e tempo nos dilanti. E informacion di e FEM 2 lo yuda determina, entre otro, e periodo di pago y e porcentahe di interes.
Minister Maduro ta gradici Minister President Wever-Croes pa su guia, Secretario di Estado Van Huffelen y su ekipo pa e bon reunion y team di Aruba pa nan sosten y trabou profesional na bienestar di Aruba.