Mas y mas e rol di hende homber den bida di nan yiu y e rol di hende homber den violencia relacional ta haya mas importancia, no solamente na Aruba, pero tambe den Caribe.
For di 23 aña pasa cu Fundacion Telefon pa Hubentud Aruba a ser funda, e organizacion aki semper a mira e rol di hende homber den diferente proyectonan di Fundacion Telefon pa Hubentud Aruba como uno hopi importante. Den Caribe hopi biaha e hende homber no tawata tuma su responsabilidad den educacion di su yiunan y no tawata involucra. Esaki hopi biaha tawata ser mira como e tarea di e hende muher. E rol di e hende homber tawata mas pa zorg pa e parti financiero di e famia.
Pa loke ta trata violencia relacional, cifranan hopi biaha ta mustra cu e hende homber ta e agresor y e hende muher hunto cu su yuinan ta experiencia e violencia. Di otro banda por mira tambe cu mas y mas e hende homber ta esun cu ta experiencia e violencia y e hende muher ta e agresor.
Ausencia di tata den bida di nan yiu y/ of violencia den famia tin un impacto negativo den e bida di nos muchanan/ hobennan. Fundacion Telefon pa Hubentud Aruba semper a para pa un educacion di calidad pa tur mucha. Na momento cu un tata ta involucra den e bida di su yiu y violencia den famia no ta tuma lugar, e mucha ta haya un educacion di calidad.
For di 21 di maart te cu 26 di maart, Telefon pa Hubentud a ehecuta 7 workshop pa hende homber na Sint Eustatius. Cinco di e workshopnan a ser duna na hende homber adulto y 2 na hobenan masculino. Durante un di e workshopnan pa hende homber adulto, profesionalnan di e sector social y husticia tambe a participa.
E workshopnan na e hende hombernan na Sint Eustatius ta den cuadro di e ‘kenniscentrum’ di Fundacion Telefon pa Hubentud Aruba cu ta exportando conocimiento. Despues di 23 aña di existencia Fundacion Telefon pa Hubentud Aruba como un ‘Kenniscentrum’ ta exportanando conocimento na organisacionan gubernamental y no-gubernamental den region. Banda di crea conocimiento y comparti conocimento, awor Fundacion Telefon pa Hubentud Aruba como un ‘Kenniscentrum’ ta bai sigui exporta conocimento.
Fundacion Telefon pa Hubentud Aruba kier a gradici su partnersnan cu ta tuma nan impacto social hopi serio y ta inverti den nos cuminidad. Un gradicimento ta bai na Aruba Airport Authority N.V., Web Aruba N.V., Setar N.V., The Salamander Group y Openbaar Lichaam Sint Eustatius.
Pa mas informacion tocante workshop tocante e rol di hende homber den bida di nan yiu y hende homber y comportacion violento, por tuma contacto cu Fundacion Telefon pa Hubentud Aruba via nos website: 131.aw, Instagram: 131aruba, facebook: https://www.facebook.com/telefon.hubentud/, email: [email protected] of telefon 5886138/ 5884011.
