Palm Beach: Diamars algo pasa di 4’or di atardi, ta drenta un informe cu un homber lo a haya problema den e lama dilanti di Holiday Inn Beach Resort. Aparentemente lo tabata trata di un homber turista, cu tabata malo y cu ayera lo a sali for di hospital y lo ta hospedando na Holiday Inn.
Mesora a bati alarma Polis y ambulance a bay na e sitio, dos unidad di ambulance a presenta hopi lihe na Holiday Inn, despues di basta rato cu e paramediconan tabata dunando e homber CPR, a bin resulta cu e homber aki a fayece. E paramediconan a tapa e curpa sin bida y a pidi pa dokter bin constata morto.
Mesora a pidi pa slachtofferhulp bin atende cu e famia, mientras tabata warda riba yegada di dokter. Esaki ta di dos turista cu awe a perdenan bida den e lama di Aruba. Den oranan mas trempan di merdia un homber turista a hoga caba na Arashi.