ORANJESTAD, Aruba – 4 April 2023: Aruba Hotel & Tourism Association (AHATA) recientemente a demonstra aprecio y inspira orguyo pa e hobennan cu ta studiando den e sector di hospitalidad na diferente scol na Aruba. Presidente y CEO di AHATA, Tisa LaSorte a hasi bishita na EPB San Nicolaas (Unidad di Servicio), EPB Oranjestad (Unidad di Servicio), EPI (Sector di Hospitalidad y Turismo), y Universidad di Aruba (Faculty of Hospitality & Tourism Management Studies) pa conversa cu e studiantenan y regala t-shirts di e campaña “Ami Ta Turismo”.
Den total e asociasion a distribui mas cu 750 t-shirt di ‘Ami Ta Turismo’ na e studiantenan cu lo bira e siguiente generacion di profesionalnan den nos industria turistico. Intencion di e campaña ta pa inspira orguyo pa e escogencia di hospitalidad como carera.
Adicionalmente, Vanessa Rasmussen, Manager Member Services di AHATA a regla pa donacion di laptop na cada scol pa studiantenan por usa.
E bishita y regalonan ta un indicacion di AHATA su compromiso pa crea mas conscientisacion den nos comunidad, specialmente hobennan, di e diferente oportunidad cu tin den nos sector turistico pa un bon carera y calidad di bida. E asociasion ta spera cu e bishita lo sirbi como un recordatorio pa studiantenan di e rol importante cada un por tin den sostene Aruba su economia y pa inspira nan pa sigui nan estudio y realisa un carera fructifero.
