Savaneta – Diadomingo den oranan di anochi polis a bay Savaneta, pa ta exacto e caminda parti paden cerca di e cura di Mariniers Kazerne.
Na e sitio polis a bin topa cu un auto color blanco pega contra e mata di kwihi grandi cu tin cerca di e cura y alabes e caminda.
Polis a bin topa cu un hoben tras di stuur, cu pa un of otro motibo a baha caminda y cu velocidad halto a bay dal e troncon di kwihi.
Debi na e impacto duro e hoben a kibra e stuurwiel cu su pecho y tambe por a mira cu e bateria di e auto a sali bay cay basta mester mas leu di unda e accidente mes a tuma luga.
Ambulance a wordo pidi y na yegada Paramediconan a opta pa transporta e hoben rapidamente pa Hospitaal den un situacion serio.
Polis di trafico na su turno y mirando e seriedad a pidi pa slachtofferhulp y tambe departanento tecnico di polis. E ultimo ta pasa saca imagennan necesario pa cu e investigacion di e accidente.
