Home » 4 aña y mey y 5 aña di prison pa trio envolvi den traficacion di 348 kilo di cocaina

4 aña y mey y 5 aña di prison pa trio envolvi den traficacion di 348 kilo di cocaina

by Admin
0 comment 123 views

 

ORANJESTAD – Awe mainta Hues di Corte den Promer Instancia a dicta sentencia den e caso penal cu Ministerio Publico a cuminsa contra e hombernan Venezolano J.L.H., I.B. y e Colombiano V.C.F.

ARUBA NATIVE por a compronde cu Hues pa dos di e acusadonan a confirma e exigencia di Fiscal cu ta 5 aña di prison mientras cu pa un el a condena na 4 aña y 6 luna di prison pasobra e acusado ey tabata e unico cu a arepenti pa loke el a haci.

Dia 22 Juli 2022, Guarda Costa a intercepta e boto den cual nan tabata. A haya 14 bulto y investigacion a mustra cu solamente 2 bulto tabatin cocaina. En total a confisca 348 kilo di cocaina cu tabata destina pa Santo Domingo.

FISCAL

Dia 10 di Maart 2023 durante tratamento di e caso, Fiscal a bisa cu e trio aki tabata envolvi den traficacion di droga. En total tabatin 5 persona abordo di e lancha. E trio aki tin indicacion cu nan tabata sa di transport di e droga pa Santo Domingo. E otronan no. Fiscal a bisa cu droga ta un problema grandi na Aruba. Tin hopi placa envolvi den traficacion y droga ta causa criminalidad. Fiscal a exigi 5 aña di prison pa cada un. El a exigi pa e droga wordo destrui.

SENTENCIA

Awe mainta Hues a bisa cu e ta haya legalmente proba e transportacion di droga.

Hues a bisa cu J.L.H. a bisa cu e tabata sospecha cu tin droga pero door cu tin hendenan pafor para, e no por baha for di e boto. Hues a rechaza e ponencia aki. Hues a mustra cu 348 kilo di cocaina a keda confisca.

Hues a remarca cu ta increibel cu hendenan cu ta trafica droga ta laga hende cu no sa di nada ta bay transporta asina hopi droga. Hues a bisa cu tin otro sospechosonan ta bisa kico tabata e funcion di J.L.H. riba e boto. El a bisa cu e no tin motibo pa duda den nan declaracion pero si e ta duda den declaracion di J.L.H. Pa cu e castigo, Hues a bisa cu e ta tene cuenta cu e cantidad di droga cu a keda confisca, Hues a conclui cu e droga aki tabata destina pa negoshi. Hues a bisa cu e ta tene cuenta cu orientacion di Hof pa cu casonan asina. Tambe el a tene cuenta cu J.K.H. ta promer biaha cu e ta cay den man di husticia pa droga. Hues ta haya e castigo exigi pa Fiscal, esta 5 aña di prison na su lugar. Hues a condena J.L.H. na 5 aña di prison, kitando e tempo cu e ta sera den KIA.

Hues a sigui cu V.C.F.. El a bisa cu e ta haya V.C.F. tambe ta culpable. Hues a rechaza e defensa cu V.C.F. tabata bou amenaza. Hues a mustra cu na Polis V.C.F. a bisa cu el a wordo pidi y el a bay di acuerdo. Tambe cu V.C.F. a bisa cu e mester controla e gasoline y a yuda navega e boto. Hues a bisa cu e ta haya cu V.C.F. a gaña den Corte cu el a wordo menaza. Hues a condena V.C.F. tambe na 5 aña di prison, kitando e tempo cu e ta sera den KIA.

Hues a sigui cu I.B. E ta haya I.B. tambe ta culpable. Aki tambe Hues a rechaza e defensa cu I.B. tabata bou amenaza. Hues a bisa cu pa cu e castigo, e ta tene cuenta den Corte I.B. tabata e unico cu a mustra cu e ta arepenti. Pesey el a condena I.B. na 4 aña y 6 luna di prison, kitando e tempo cu e ta sera den KIA. Hues a ordena pa destrui e 348 kilo di cocaina.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio