Home » Proyecto ‘Manteniendo Herencia Bibo den Tempo’ MINISTER XIOMARA MADURO A BISHITA MUSEO ARQUEOLOGICO NACIONAL ARUBANO PA MIRA E RENOBACION CU A TUMA LUGA

Proyecto ‘Manteniendo Herencia Bibo den Tempo’ MINISTER XIOMARA MADURO A BISHITA MUSEO ARQUEOLOGICO NACIONAL ARUBANO PA MIRA E RENOBACION CU A TUMA LUGA

by Admin
0 comment 120 views

A drecha 3 monumento protegi y ta traha riba dos exposicion temporario nobo

 

‘Manteniendo Herencia Bibo den Tempo’ ta e proyecto den cual 3 edificio monumental cu ta forma parti e Ecury Complex den cual Museo Arqueologico Nacional Aruba (MANA) ta situa, ta wordo renoba. Ta trata di Cas Dun Dun, Cas di Cunuco y Ex-Fruteria cu ta wordo drecha pa asina por bay brinda dos exposicion nobo. Siman pasa, Minister di Cultura, a pasa mira e trabounan cu ya caba a ser realisa. 

 

Un inversion di 1.3 miyon florin

Oficina di Monumento a prepara y ehecuta e trabounan di drechamento di e tres edificionan monumental, y e compania di construccion Van Kessel Havenbedrijf a haci e trabou di mantencion durante un trayecto di casi un aña. UNOCA y Pais Aruba pa medio di Ministerio di Finansa a carga e gastonan di renobacion cu ta core den 650 mil florin. Hunto cu e dos exposicion nobo, e proyecto ‘Manteniendo Herencia Bibo den Tempo’ lo ta un inversion di 1.3 miyin florin.

 

Renobacion

Tres monumento cu ta determina e cara di MANA ta wordo renoba. Ta trata di Schelpstraat 42 cu ta consisti di dos edificio, Cas di Cunucu cu ta conecta cu e mansion di Cas Dun Dun cu ta data di aña 1929 y probablemente ta diseña door di conocido Dada Picus, arkitecto autodidacto popular di Aruba. E otro edificio ta Schelpstraat 44, cu ta wordo yama Ex Fruteria. Esaki ta data di mas o menos aña 1867 y ta un cas di cunucu traha door di Louis Rosenberg  y cumpra despues door di Famia Ecury.

 

Dos exposicion nobo

E proyecto ‘Manteniendo Herencia Bibo den Tempo’ ta consisti tambe di dos expisocion nobo, di cual contenido y presentacion den man di curator Renwick Heronimo den estrecho colaboracion cu personal di MANA. Den e exposicion lo por bay aprecia diferente documentarionan audio visual relaciona cu  e monumentonan, famia Ecury y nan antepasado. E documentarionan ta bay keda produci pa Rebecca Roos. Tambe ta trahando riba un exposicion cu ta concentra riba posicion di famia Ecury relaciona cu desaroyo di Aruba, muy en particular Playa, den decada 30 – 40 di siglo pasa. Un otro exposicion lo refleha balornan di e sociedad Arubano durante epoca di prome habitantenan Indjan, Periodo Colonial, Periodo Historico y awendia. Un ehempel ta e balor cu ta duna naturalesa.  E prome habitantenan tabata integra den naturalesa. 

 

Colonisadornan a explota naturalesa y hende como medio economico y awendia humanidad ta rebalota naturalesa como fuente di bida.

 

Entrada nobo

Cambionan den uzo general ta dirigi pa invita publico pa drenta MANA door di trece mas transparencia habriendo portanan di glas, jalusi di palo y haci e entrada principal via entrada mahestuoso di Cas Dun Dun. Asina ta brinda un bista di pafor di e monumentonan pa paden. Tur elemento structural a keda mescos y a mantene e colornan existente. Paden a adapta e color pa por acomoda e exposicionnan nobo y a expone un muraya pa luci e piedranan y tecnica cu a ser uza den Cas Dun Dun. A percura tambe pa facilita e coneccion entre e edificionan pa asina bishitantenan por explora libremente e compleho den total. Edificionan monumental, exposicion permanente y hardinan ta forma un totalidad cu ta brinda un ambiente unico den dia y tambe anochi.

 

Ban tene nos herencia bibo den tempo

E proyecto ‘Manteniendo Herencia Bibo den Tempo’ ta premira pa keda completa den e ultimo kwartaal di 2023. Mientrastanto ta sigui explora posibilidad pa drecha Cas di Mamachi (Villa Urbano cora y blanco) y e Edificio multifuncional moderno. Minister Xiomara Maduro di Cultura ta contento pa mira con e trabounan ta canando pa denter di poco Pueblo por bishita MANA su exposicion nobo. Ta importante pa nos keda bishita y inverti den MANA pa asina tene nos herencia cultural bibo den tempo.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio