Home » Minister Thijsen a bishita burgemeester di Groningen Koen Schuiling

Minister Thijsen a bishita burgemeester di Groningen Koen Schuiling

by Admin
0 comment 79 views

Den Haag  – Minister Plenipotenciario mr. Ady Thijsen a haci un bishita na burgemeester di Groningen Koen Schuiling.

 

Sr. Thijsen a gradici burgemeester Schuiling pa e oportunidad aki pa combersa riba posibilidad di cooperacion entre Groningen y Aruba. E mandatario a bisa cu e combersacionnan aki mester conduci na un relacion duradero cu diferente municipionan (gemeente) grandi of semi grandi di Hulanda y cu e ta mira un significacion grandi pa estrecha e lasonan entre Aruba y e municipionan. Segun sr. Thijsen como meta pa Aruba ta visible pa un y tur na Hulanda.

 

Un tema cu a bin dilanti den e combersacion ta e cuestion di camber pa studiante na Groningen, mirando cu Groningen ta un ciudad cu un Universidad y Hogescholen. Burgemeester Schuiling a bisa cu bou di studiantenan ta purba na yuda otro cu tipnan unda tin cambernan liber. Pero segun e burgemeester esaki no ta un solucion cualitativo, pesey Groningen ta purba na bin cu solucionan mas cuantitativo. ‘Nos a haci palabracionnan cu agencianan di “real estate”. Esaki pa prepara e studiantenan bon pa nan no haya nan confronta cu personanan cu mal intencion. Con esaki ta bai? Asina cu un studiante inscribi su mes pa un estudio, e ta ricibi informacion. Nos ta na haltura cu studiantenan for di e parti Caribense di Reino no ta bin na remarca pa esaki, pasobra nan no ta wordo considera como studiante internacional. Sr. Schuiling ta convenci cu e señalnan aki mester yega cerca dje,’ asina ela bisa.

Burgemeester Schuiling a sigi na bisa cu Groningen tin un bureau cu ta ocupa pa ricibi studiantenan internacional cu no a nace na Hulanda. Pesey sr. Schuiling a propone pa ricibi e lista di studiantenan di Aruba cu ta pensa pa bin studia na Groningen y a bisa di ta desea na ricibi e studiantenan di Aruba personalmente na stadhuis. Schuiling: ‘Mester brinda e studiantenan for di e parti Caribense di Reino e oportunidad pa integra den e comunidad di Groningen. Nan ta wordo mira di un banda como studiante extranhero, mientras cu nan tin un paspoort Hulandes. Como burgemeester mi ta boga pa harmonia y yama tur hende bon bini na Groningen. Hasta nos a traha un video special dirigi na studiantenan internacional. Nos por adapta e video aki pa e grupo di studiante di Aruba,’ asina burgemeester Schuiling a comenta.

Minister Thijsen a bisa di ta contento cu e manera di pensa di burgemeester Schuiling y cu sigur Arubahuis lo coopera pa e haya e lista di studiantenan di Aruba. Arubahuis tin un studiementor den e region di Groningen cu sigur tambe por yuda den esaki.

Pa keda den e mundo di studiante, burgemeester Schuiling a bisa di ta hopi importante pa e studiantenan di Aruba afilia nan mes na un organisacion di studiante. Mester bin mas concientisacion riba e tereno aki. Si mester tuma nota cu studiantenan Arubiano ta bisa cu nan no ta sinti nan mes acepta den un organisacion di studiante.

 

Otro punto cu Minister Plenipotenciario a papia cu burgemeester Schuiling ta e problema di “vergrijzing” na Aruba cu ta e cantidad di personanan riba 65 aña na Aruba y e cuido cu mester bin pa e personanan aki. ‘Nos mester stimula nos hobennan pa sigi estudionan den salubridad; cuido di anciano y pa nan regresa Aruba, pasobra nos mester di nan. E problema aki tambe tin su efecto riba e mercado laboral cu ta wordo calcula cu pa future mester di hopi trahador for di pafor di Aruba. Esaki lo pone un presion grandi riba e isla,’ segun sr. Thijsen.

Burgemeester Schuiling a bisa cu loke tin na Groningen ta cu hendenan di edad ta biba isola, na momento cu nan no ta biba den un instancia cu personanan di mesun origen. Pesey Groningen a start cu un “woon-community” cu por brinda esaki na e personanan aki.

 

Minister Thijsen finalmente a gradici  burgemeester Schuiling pa e recepcion y combersacion hopi ameno pa despues intercambia regalo como recuerdo di e bishita di minister Thijsen na e burgemeester di Groningen.

  

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio