Un biaha mas, Aruba su nomber a subi tarima internacional y e biaha aki marcando historia na momento cu Prome Minister Evelyn Wever-Croes a wordo guia na e centro di e sala di Asamblea General na Nacionnan Uni pa precidi e reunion y asina tambe clausura e UN 2023 Water Conference na New York. Esaki ta e prome biaha den historia cu un Arubiano ta precidi un reunion na Nacionnan Uni como presidente, Presidencia Ex officio. Y e honor aki a toca un hende muhe di nos pais, nos Prome Minister Evelyn Wever-Croes.
Siman pasa, Prome Minister y Minister Ursell Arends a representa Aruba dignamente na e UN 2023 Water Conference na New York. Aruba a resalta un biaha mas internacionalmente.
Prome Minister a remarca cu na Aruba nos ta riba e bon caminda cu hopi cos bon caba pero ainda tin hopi trabou pa haci. Prome Minister a expresa cu el a siña hopi di e conferencia aki. Principalmente e conferencia ta conscientisa cu tin mester di sigui traha pa garantisa cu tur hende na Aruba por tin e bon calidad di awa pa bebe y ta accesibel na un prijs cu tur hende por paga. Tambe Aruba mester traha riba RWZI (rioolwaterzuiveringsinstallatie) pa asina hopi lihe yega na un solucion pa esaki. Proteccion y cuido di nos oceano, bida den lama y e coralnan, ta un otro reto cu mester tene cuenta cu ne pa asina nos por garantisa e stabilidad di nos pilar economico, nos turismo.
“Hopi a wordo papia. Pero awo ta e momento pa accion. Aruba ta riba e bon caminda pero tin trabounan cu ainda mester wordo haci”, Prome Minister a enfatisa.
Prome Minister Evelyn Wever-Croes: “Mi ta mira bek atras riba un conferencia hopi intensivo, hopi trabou y cansacio, pero mi ta sumamente satisfecho con esaki a bay. Y ta keda nos pa sigui cu tur e trabounan cu nos tin mester di haci pa Aruba. Mi ta contento di conta cu partners y hendenan cu ta interesa pa yuda nos soluciona e problemanan pa Aruba”.
