ORANJESTAD – Awe mainta mester a tuma lugar e caso penal cu Ministerio Publico a cuminsa contra 4 sospechoso di pelea, maltrato y violencia den un lugar publico.
ARUBA NATIVE por a compronde cu door cu dos di e sospechosonan, nan abogado a pidi pa pospone e caso, Hues a dicidi di pospone e caso completo.
DOS SOSPECHOSO DEN EXTERIOR
Den sala di Corte tabata presente K.W. y A.D.W. y nan tata. E otro dos sospechosonan, esta Y.M. y N.W. no tabata presente. Via video conference tabatin contacto na Hulanda cu Y.M.
Ta asina cu N.W., ruman di A.D.W., tambe ta den exterior. E ta na Miami y a perde vuelo pa bin Aruba. A purba drenta den contacto cun’e via video conference pero esey no a resulta. Su abogado mr. Mohamed e ora ey a pidi Hues pa pospone e caso mescos cu mr. Rosenstand di A.D.W. a pidi.
A.D.W. a presenta cu mr. Rosenstand. Parce cu A.D.W. no tabata kier mas pa mr. D.Croes defende y e abogado a retira. Mr. Rosenstand a pidi pa pospone e caso pasobra ta algun dia pasa el a bira e abogado di A.D.W. y e no ta haya e procesverbaal ainda. E kier haya tempo pa studia esaki.
HUES A POSPONE CASO
Den promer instante, Hues tabata kier a sigui cu tratamento di e caso penal contra Y.M., K.W. y N.W. pero door cu no por a haya contacto cu N.W., el a dicidi di pospone e caso.
Ta asina cu den sala di Corte tabata presente e victima homber A.L. Hues a bisa cu e intension tabata pa confronta e sospechosonan cu imagennan di video di loke a sosode dia 14 November 2021 y haci preguntanan. Fiscal a bisa Hues cu e ta fastioso cu ta e partido Y.M. y K.W. so tey y no ta haya e otro banda di medaya cu ta e rumannan N.W. y A.D.W.
Hues a bisa cu el a prepara e caso completo y lo ta mihor pa e pospone e caso pa dia 3 April 2023, caminda e mes lo bay atende e caso. Por a ripara cu dos Fiscal a presenta den Corte pa atende e caso.
A keda palabra cu dia 3 di April 2023 mainta lo trata e caso aki. A tuma henter un mainta y no riba dia cu sa trata casonan penal.