Home » Un mil tres cien y pico bishitante a disfruta na MANA durante Himno y Bandera 2023

Un mil tres cien y pico bishitante a disfruta na MANA durante Himno y Bandera 2023

by Admin
0 comment 112 views

 

 

Dia 18 di maart ultimo tabata un dia alegre y hopi positivo pa Museo Arqueologico Nacional Aruba (MANA). Un 1300 y pico persona a bishit’e y a disfruta di tur loke tabata ofrece. Famianan a explora salanan di exposicion, espacionan restaura y e bunita exposicion di cuadra di Club Kibrahacha. Muchanan a busca nan stempel y facepainting di Indjan, a hunga wega, traha obra di man y a decora cupcake den skina di mucha di Pastoral Hubenil Dakota.

Dilanti di Fruteria (monumento geel) publico a disfruta di diferente presentacion cultural. Pa 10’or di mainta, grupo di cuarta di Club Kibrahacha, hunto cu trahadornan y publico presente a habri e dia cantando Himno di Aruba, mientras a hisa e bandera di Aruba, cortesia di Oficina di Monumento Aruba. A sigui deleita publico cu canticanan tipico y ‘line dancing’ di Club Kibrahacha. Rosea Cultural hunto cu Marcia Dirksz y participante hubenil na “Un canto pa Aruba”, Lizenne Ras, a presenta bunita canto, baile y poesia inspirativo. A clausura e dia ameno cu canticanan di antaño, canta y toca riba gitara pa sr. Donny Boekhoudt, cu participacion di bishitantenan di diferente edad.

Bishitantenan a keda encanta pa e bunitesa di e espacionan restaura, danki na sosten di Pais Aruba/ Ministerio di Finansa y Cultura y UNOCA, y bou di supervision di Oficina di Monumento di Aruba. Mueble- y piesanan di antes, di entre otro famia Ecury, a crea un ambiente nostalgico. Director interino sr. Pancho Geerman a duna guia na esnan interesa den Cas Dun Dun y e ex-Fruteria restaura. Den e ultimo espacio aki Club Kibrahacha a presenta un exposicion di cuadra di su clientenan cu a impresiona grandi y chikito.

E exposicion contemporaneo temporario “Aruba Dushi Tera” di e artista multi disciplinario, Olga van Bochove, a fascina bishitante di tur edad. E lo keda pa un par di luna ainda den e parti di Arte Contemporaneo den sala di exposicion di dos piso.

Grupo Pastoral Hubenil Dakota a traha duro ofreciendo famianan entretenimiento den forma di ‘photobooth’, ‘facepainting’, diferente wega, obra di man y ‘cupcake-decorating’ den tema di Dia di Himno y Bandera. Tambe nan a bende popcorn, snacks y cumindanan crioyo pa tur esnan cu tabata tin gana di come un dushi pasaboca durante nan bishita.

Dia Nacional 18 di maart 2023 tabata un exito rotundo na Museo Arqueologico Nacional Aruba. MANA ta gradici un y tur cu a yuda cu e dia aki, en especial Club Kibrahacha y Pastoral Hubenil Dakota, Rosea Cultural, sra. Marcia Dirksz, Lizenne Ras y sr. Donny Boekhoudt. Tambe nos Brigada Hubenil, Ministerio di Cultura y sigur pueblo di Aruba cu a bishita MANA riba e dia special aki.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio