Aruba a celebra nos dia nacional 18 di maart 2023 den un gran forma. E weekend prome Aruba a bini masalmente na Plaza Betico Croes pa asina apoya nos cantantenan y tambe disfruta di e dushi cumindanan y artesania di Aruba. E weekend tras di lomba tambe a acudi hopi hende pa e celebracion di 18 di maart na Plaza, pero tambe rond di Aruba. Tabata tin actividad den diferente bario. Esaki sigur ta un muestra dje union den nos pueblo.
Como parlamentario mi ta haya e concepto di unda nos localnan por bende y pueblo por cumpra y topa ta di gran balor. Pa menciona, Santa Rosa (Piedra Plat), 297 Farmers (Savaneta) y STR Farmers (Alto Vista) ta organisando diasabra awo 25 di maart 2023 lo tin un “pop-up farmers market roadmap” cu benta di fruta, berdura, carni y bebida natural. Ta producto saludabel y di bon prijs. Lo tin 3 localidad den diferente bario, unda por pasa y cumpra producto fresco y local. Esaki ta haci’e mas facil tambe pa e habitantenan di e bario yega.
Sigur, ta bon iniciativa pa cuminsa cu e “pop-up farmers market roadmap” y continua cu esaki y tambe lo ta un idea pa si gobierno di Aruba lo por sigui organisa e actividad di Plaza Betico Croes durante aña. Di e forma aki pueblo di Aruba lo por topa otro, socialisa y cumpra e productonan local.
Ta importante pa menciona cu por mira cu ta cuminda hopi dushi y artesania hopi bunita nos hendenan ta haci. Incluso esaki por saca tambe cada potencial di cada persona y sigui bende nan productonan mas aya. E ta pa pueblo disfruta, pero tambe crea oportunidad pa e productonan local bay riba e mercadonan internacional.
