Home » Parlamentario Marco Berlis (MEP): De Meza a declara cu el a trek in e caso contra Briesen paso no tawata tin base pa persigui’e

Parlamentario Marco Berlis (MEP): De Meza a declara cu el a trek in e caso contra Briesen paso no tawata tin base pa persigui’e

by Admin
0 comment 77 views

AVP kier a persigui Briesen politicamente

 

Durante di e reunion publico riba diahuebs 16 di maart, sr. Mike de Meza a declara den Parlamento durante su discurso den e prome tanda, cu ta pa via di persecusion personal politico di su ex-colega di partido AVP sr. Otmar Oduber, e contract cu Lee Tofanelli y Associates (LTA) a wordo kibra. Den su discurso sr. de Meza a declara cu esaki no mester a sucede asina pero cu e no ta bay sconde pa niun hende. El a declara cu ta e mes a busca consehonan huridico y cu huristanan a conseh’e pa no bay casacion despues cu Pais Aruba a perde su caso den Corte Comun contra LTA, mirando cu no tawata tin ningun irregularidad den e contract aki. Asina, sr. de Meza a reitera cu e mes a stop tur intencion pa bay casacion. Esaki a ocaciona cu e capricho di sr. Otmar Oduber pa kibra un contract cu tawata legitimo y na ordo, y pa djis persigui sr. Briesen, atacha su nomber y di su famia, awe Pais Aruba mester paga 2.1 miyon florin na daño causa na Lee Tofanelli & Associates. 

 

Mike de Meza mes a firma e carta

Nos a presenta den parlamento dos documento den forma di dos carta cu ta evidencia grandi pa expone e berdad tras di tur locual a sucede den e proceso aki den e caso di Tofanelli. Un di e cartanan aki tabata di ex-minister Mike de Meza pa abogado sr. Chris Lejuez (qepd). Den e prome carta aki Mike de Meza ta bisa abogado Lejuez pa “trek in” e “vrijwaringszaak” cu Pais Aruba a lanta contra sr. Briesen, y pa termina esaki sin cu esaki lo costa Pais Aruba placa. E carta aki a wordo traha dia 24 di April 2017 y a wordo firma pa sr. de Meza. Kico esaki ta significa? E ta significa cu ta sr. de Meza ta esun cu a “exonera” sr. Briesen di e caso aki, paso sr. de Meza a wordo conseha pa no sigui cu esaki. Den e di dos carta data 4 di Mei 2017 abogado Lejuez (qepd) ta sinta cu sr. Briesen pa firma un carta cu 5 punto pa asina concretisa y formalisa pa nunca mas den futuro ni den ningun otro forma por yega di acusa sr. Briesen mas p’e caso aki. Asina sr. de Meza a asegura cu nunca mas lo por persigui ni punta dede riba sr. Briesen.

 

Falta di comunicacion den coalicion di oposicion

Ta remarcabel cu pa simannan largo AVP y MAS a sali grita tur sorto di acusacion contra sr. Briesen y Gobierno di Aruba. Sra. Marisol Lopez-Tromp a traha un video gañando cu e reunion publico su meta lo ta pa “exonera” sr. Briesen pa paga e 2.1 miyon aki. Durante e reunion, Despues di a scucha y wak e evidencianan cu nos di MEP a trece y e declaracion di nan mesun colega sr. Mike de Meza nan a cambia tono y a hala atras completamente. Spera cu ambos Marisol y AVP por pidi despensa na sr. Briesen! E ta un hecho cu tres hues den Corte Comun a dicta cu sr. Briesen NO a kibra ley di Contabilidad, tres hues a dicta e contract tabata legal y no mester a wordo kibra y cu tabata tin un acuerdo desde october 2008 pa segura continuacion. Ademas, Corte Comun no a haya cu tabata tin faboritismo, ni beneficio politico, ni a trata di tuma un decision incorecto. En general fraccion di MAS y AVP a keda na berguensa pa e avalancha di evidencianan contrario y a keda demostra fuertemente nan falta di comunicacion y falta di responsabilidad y honestidad pa atende cu informacion corecto. Paso ainda despues di ricibi splicacion di con e proceso a cana berdaderamente nan ta insisti pa sigui malinforma y sigui cu nan retorica di mentira, chaos y malicia. E 2.1 miyon cu pueblo lo mester paga a wordo causa pa AVP, cu awor kier frega su acto bergonzoso riba e gobierno actual. Ki berguensa!

Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio