Home » “Discurso  di Minister Maduro di Cultura na ocasion di e Manifestacion Cultural na honor di Dia di Himno y Bandera”

“Discurso  di Minister Maduro di Cultura na ocasion di e Manifestacion Cultural na honor di Dia di Himno y Bandera”

by Admin
0 comment 130 views
Un cordial bon nochi na tur presente, cu e protocol sirbi mi ta continua. Ta un honor pa mi como Minister di Finansa y Cultura dirigi algun palabra riba e anochi cultural aki. Cu un curason contento nos ta para aki dilanti admirando un Plaza completamente yen, pa asina hunto cu nos pueblo y bishitantenan di exterior, disfruta di nos Manifestacion Cultural. Masha danki pa honra nos cu boso presencia.
Mayan nos ta celebra cu 47 aña pasa Aruba su Bandera a bay laira pa prome bez bou di tononan di nos Himno ‘Aruba Dushi Tera’. Un wals di Juan Chabaya (Padu) Lampe, Hubert (Lio) Booi cu composicion di Rufo Wever, tur den feliz memoria.
E fecha di 18 di maart, nos Dia Nacional, ta un dia importante den historia di nos Pais. Nos por celebra nos Dia Nacional danki na e lucha di nos antepasadonan. Gilberto François (Betico) Croes a scohe e fecha aki ya cuna aña 1948, Shon A. Eman a entrega e mocion na su Mahestad Reina Juliana, pa autodeterminacion di e pueblo Arubano. E lucha pa un pais soberano a ser continua pa nos Libertador Betico Croes den añanan 70 y  asina a logra cu dia 1 di Januari 1986 Aruba a bira un Pais autonomo den Reino Hulandes.
Ta danki na e anhelo di e pueblo Arubano y e vision di nos Libertador pa Aruba por ta autonomo, awe Aruba tin su propio Himno y Bandera. Importante den e lucha aki tabata e union di nos pueblo y Betico a realisa cu pa uni un pueblo, mester tin su simbolonan di identidad. Ta den union Aruba por a surpasa tur reto y  logra e deseo di su pueblo pa ta un Pais autonomo den Reino Hulandes.
Historia di Aruba a demostra cu ‘Union ta e forsa di nos baranca tan stima’. Aruba a demostra esaki tambe, na momento cu Lago a cera y a afecta Aruba su economia profundamente. Nos hendenan cu mente creativo a uni y a crea un otro ingreso di economia pa nos Pais Aruba, cu ta nos turismo. Tres aña pasa e pandemia di COVID-19 a impacta nos economia fuertemente. Ela crea hopi inseguridad den nos Pais. Pero nos hendenan a sa di bolbe uni pa demostra e forsa di resilencia y fe cu ta caracterisa nos como Arubiano. Danki na e union aki nos Pais Aruba ta recuperando grandemente. Di e manera aki ta demostra cu ora nos uni como pueblo, nos ta logra cosnan grandi pa nos Pais.
Riba e Dia di Himno y Bandera, laga nos reflexiona y rindi honor y respet na tur cu a lucha y traha duro pa nos ta e Pais cu nos ta awor. Laga nos hisa nos bandera cu orguyo, canta nos Himno cu honor y biba e nificacion di e letranan.
Pa nos por biba nos cultura, den e luna nacional nos a organisa varios evento cultural. Nos a inicia cu tres Festival exitoso di ‘Un canto pa Aruba su Himno y Bandera’, den categoria infantil, hubenil y adulto durante cual nos a gosa di bunita letranan, inspira pa e amor pa nos Patria. Un danki na tur participante y un danki tambe na Comision Promove Cultura y Fundacion di Festival Folkorico.
Como Minister di Cultura e dianan aki nos a bishita varios scol y a experiencia con nos muchanan ta preparando pa nos Dia di Himno y Bandera. Nos a disfruta masha tanto di e bishitanan aki, durante cual nos a combersa, canta y tambe a disfruta di e presentacionnan di baile y canto di e muchanan.
A organisa un competencia di pintura pa muchanan di scol preparatorio y basico, den cual e muchanan mester pinta nan inspiracion di e seis distritonan di Aruba.
E aña aki a organisa un otro ‘Kibra Coco’ den forma digital. Esaki ta un competencia pa scol preparatorio y basico,  den cual e muchanan por a contesta varios pregunta tocante nos Himno y Bandera. Un danki na e Comision di Maestronan y Setar pa haci e competencia educativo aki posibel.
Alabes nos tabata presente na e Marcha Cultural di scolnan na San Nicolas y nos por a gosa di wak nos chikitinan baila y disfruta di locual ta nos cultura.
Nos a presencia un tremendo competencia literario “Poeta di Patria”, cu e aña aki a redobla su cantidad di participante. Un cantidad di 30 artista, un combinacion di hoben, adulto y adulto mayor cu a recita nan bunita poemanan. Masha danki na tur participante pa nan tremendo expresion di amor pa nos Pais Aruba. Danki na Comision Celebracion Dianan Nacional y Departamento di Cultura Aruba pa organisa e bunita evento aki.
Nos ta gradici tur e instancia, negoshi y organisacion cu a celebra nos Dia di Himno y Bandera hunto cu nan personal y clientenan. Un palabra tambe di agradecimento nan tur e scolnan cu ta haciendo e bunita obra pa inculca e amor pa nos patria y cultura den e mente y curason di nos muchanan.
Laga nos sigui biba den union, den paz y harmonia brindando respet na otro. Ban demostra amor pa nos patria, respet pa nos simbolonan di identidad, cuida y honra nos Pais. Ban crea hunto e union cu ta e forsa di nos baranca tan stima.
E invitacion ta pa nos bin hunto un biaha mas mayan 9’or di mainta na Plaza Betico pa den union nos rindi honor y respet na nos Himno y Bandera, compaña pa canto, baile y desfile di gruponan uniforma.
Na nos invitadonan di exterior, masha danki pa celebra hunto cu nos. Boso ta cordialmente invita pa bishita e diferente actividadnan cultural cu lo tin rond di nos isla pa sinti e calor di nos hendenan y biba nos cultura.
Por ultimo, mi kier comparti cu boso un poema cu ta un inspiracion propio cu a brota for di mi curason.
Aruba, nos baranca tan stima
Solo ta briya bo
Luna ta ilumina bo
Lama ta rondona bo
Y biento ta caricia bo
Aruba, esta un dushi tera bo ta
Un baranca fuerte y resiliente
Un luga Bendiciona
Dichoso nos ta, tur cu ta habita bo
Bo ta un isla di encanto
Cu ta namora tur cu ta bishita bo
Aruba, cuna venera
Dushi tera yena cu flor di libertad
Aruba, nos baranca tan stima
Masha danki na Comision Celebracion Dianan Nacional, Departamento di Cultura y na tur instancia y persona cu a yuda pa haci e Manifestacion Cultural aki posibel.
Ban biba nos Cultura y crea e Union cu ta e forsa di nos baranca tan stima. Feliz Dia di Himno y Bandera!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio