Den mi man mi tin e diferente documentonan di e caso Tofanelli, cu ta duna un transparencia total den e caso di Lee Tofanelli and Associates (LTA) y pais Aruba. Prome cu mi sali bisa cualkier cos semper mi ta gusta “coba” y busca tur informacion pa mi mes. Esaki ta haci cu mi informacion ta veridico y corecto pa asina pueblo di Aruba por ta sigur cu e informacion cu mi ta trece dilanti semper ta verificabel y confiabel. Pa pueblo por compronde kico e caso di ley di LTA ta encera, mi ta bai splic’e na placa chikito.
E comienso di e contract
For di 2002-2005 LTA a haya e contract pa organisa Aruba Music Festival (AMF) Esaki a wordo firma 14 di Juni 2002 entre gobierno di Aruba y LTA. Riba 18 di Juni 2004 a wordo firma otro contract entre pais Aruba y LTA pa continua organisa e AMF 2006-2009. Gobierno tabata firma cu LTA cada 3 aña pa AMF por tin continuacion. Pesey tambe a firma na 2008 pe contract di 2010-2013. Riba Augustus 8 2008 a firma un MB den cual ta stipula cu no lo bai un destaho publico, confirmando esaki basta riba e articulo 25 eerste lid y articulo 26 di ley di contabilidad, den cual ta stipula ki ora un minister mag di keda sin haci un destaho publico. Adicionalmente e articulonan aki a wordo cita den e MB pa asina splica cu a haci tur cos legalmente.
Capricho di AVP
Sinembargo dia 25 di September 2009 tabata tin eleccion na unda AVP a gana y drenta gobierno. Aki AVP a dicidi pa kibra e contract di LTA cu pais Aruba cu e argumentonan cu (1) e contract ta “in strijd met de openbare orde,” y (2) cu ex minister di Turismo Eddie Briesen a actua contra e ley di contabilidad. Ambos argumento a wordo bari for di mesa pa 3 hues di Hof na November 2016! Tofanelli a cuminsa un caso contra pais Aruba. Den prome instancia Pais a gana pero den Hof na 2016, a perde esaki y 3 hues a dicta cu; (1) E contract tabata legitimo y no mag a wordo kibra. (2) Hof a dicta cu minister no tabata demisionario na october 2008 y por a dicidi pa prolonga esaki.(3) Hues a dicta den Hof cu ex-minister Eddie Briesen NO a actua contra ley di contabilidad. (4) Tur otro argumento di AVP a keda desbarata den e vonnis di Hof 22 November 2016.
Gobierno di AVP mes a back-off
Gobierno di AVP por a bay Cassatie pa apela e decision aki di Hof, pero no a haci’e! AVP tabata tin 3 opcion: (1) Sigui den corte y bay cassatie. (2) Yega na un “schikking,”cu ta significa, cu nan mester a sinta na mesa pa yega na un acuerdo mutuo entre pais y LTA, (3) Laga hues dicidi e suma di e daño di perhuicio. Den otro palabra, AVP mes a nenga pa bay Cassatie, AVP a negocia cu LTA, AVP no a paga durante tur e añanan den gobierno y interes a subi masha hopi mes; casi 200.000 florin! AVP a negocia y pesey awor mester a traha un ley pa traha un base legal pa paga e suma acorda na LTA. Pesey e caso aki no ta di minister Dangui Oduber, sino e consecuencia di decision di gabinete Mike Eman-1. Gobernacion ta un continuacion y awor mester paga pe error di AVP y pasa e ley aki.
Den conclusion e ta importante pa pueblo compronde, cu gobierno di AVP ta esun cu a sinta na mesa cu LTA pa yega na un acuerdo pa paga nan p’e contract kibra ilegitimamente. Si Parlamento no aproba e ley aki, pais Aruba ta sali mas perhudica ainda pa e actonan y decision di AVP y no di e gobierno actual! Pasando e Ley aki nos ta evita pa e suma sigui crece y perhudica pais Aruba ainda mas. Finalmente nos por wak cu aunke AVP no ta den gobierno, ainda pueblo mester paga pa nan mal maneho y falta di transparencia! Pesey, hechonan ta asina importante! AVP nunca mas!
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!