En conexion cu e proyecto di Aruba Doet.
ORANJESTAD: Diasabra ultimo, Minister Endy Croes a bishita veld di baseball, Centro di Bario di Noord. Un grupo hopi grandi di boluntario tabata trahando riba e veld den e proyecto di Aruba Doet. A haci diferente trabou pa e mantencion di e facilidad, entre otro, a cambia e wayanan, a welder, a verf, a haci trabou di metsla y basha pilar. Banda di esaki, a traha un veld nobo pa e muchanan di mas chikito entre e edad di 4 pa 7 aña den e Center Field. A traves di Lotto pa Deporte, Gobierno di Aruba a haya peticion pa mantencion di e veld aki y a pone tres (3) ekipo pisa eynan pa hala tres (3) container cu tabata strobando pa termina e proyecto. Despues di a benta e containernan aki afo, a rosa e veld y haci ful rond di e veld limpi. Ta premira cu durante e siman aki ta termina e trabou. Minister Endy Croes ta duna palabra di pabien na Parlamentario Shailiny Tromp-Lee cu ta lidera e proyecto aki y na tur e boluntarionan cu a bay yuda cu e mantencion di e veld. Ministerio di Deporte ta contento di por a brinda ayudo a traves di Lotto pa Deporte pa e mantencion di Centro di Bario Noord.
