Chevrolet Celta laga atras despues di persecusion

Sividivi – Diaranson anochi pasa di 8’or patruya di Playa a duna un Chevrolet Celta ordo pa para, esaki no a cumpli cu e ordo di polis.

E Chevrolet Celta a subi velocidad y asina a cuminsa un persecusion no cortico.

Esaki a termina den SIVIDIVI, schuin patras unda antes tawata e bar restaurant. Di eynan e ocupante lo a baha core bay ariba un velocidad basta halto lagando dos agente policial atras.

Despues di algun rato e area tawata yen di polis, cu a bin yuda nan coleganan pero sin resultado.

Pa locual ta e vehiculo, esaki a wordo hiba warda di Santa Cruz cu takelwagen.

Kiko ta e motibo cu e chauffeur a baha core bay y desaparece den e scuridad di anochi no ta conoci. Tampoco ta conoci pa kiko polisnan a duna un stopteken.