Ankara, Turkiya /Damascus Syria:
Dialuna den careda di 4 or di marduga, ora local na Turkiya, un temblor hopi fuerte a dal e pais, tambe Siria y Paisnan den becindario, e temblor tabata uno di 7.8 pa 8.0.
Un temblor cu a laga un desaster atras. E tabata e temblor di mas fuerte cu a wordo sinti den e area aki, desde 1939.
Segun e rampenburo di Turkiya mas di 11 mil edificio a wordo destrui pa e temblor aki y mas di 8500 hende registra cu a perde nan bida y ta pronostica cu e dianan nos e cantidad di mortonan lo aumenta. Na Syria 2600 a perde nan bida .
Segun World Health Organization (WHO) ta pronostica cu e cantidad di morto lo por yega 20mil. Segun informacion no oficial ta papia cu entre e desaparecidonan tin 7 persona di nacionalidad Hulandes, pero te na e momentonan aki, e informacion aki no a wordo confirma pa Ministerio di Relacionnan Exterior di Hulanda.
Na Ankara capital di Turkiya a instala un crisiscentrum. Na Turkiya a logra saca mas cu 8 mil hende cu tabata pega bou di e restonan di edificionan cu a wordo destrui pa e temblor Dialuna ultimo. Segun medianan local, ainda lo por tin miles y miles di persona tapa bou di e restonan di e edificionan y casnan cu a keda destrui. Tambe segun medianan local hopi di e edificionnan cu a basha den, no tabata cumpli cu e exigencia cu a wordo introduci despues di e temblor na aña 1999.
Trabounan di rescate ta sigui, pa asina trata na saca mas lihe cu ta posibel mas persona cu ainda ta na bida y ta pega bou di e restonan di e edificionan. E personanan cu ta pega bou di e edificionan, cu wordo scucha pa e team di rescate, tin chens di sobrevivi, pero e operacion mes pa rescata un persona of un famia por dura oranan largo. E friedad di winter ta hungando un rol, e ta strobando e trabounan di rescate y e frieu tambe ta hungando un rol, temperatura di curpa di e victimanan por baha y nan por haya onderkoeling.
Trabounan di rescate,
Na Turkiya, despues di mas di 40 ora team di rescate a logra saca un par di morocho di 1 aña y mey, e par di morocho tabata biba cu nan mayornan y rumannan riba e di 5 piso di un edificio, despues cu a rescata e dos criaturanan, a logra rescata nan mayornan y rumannan cu tambe tabata pega.
Na Siria un team di rescate a logra saca un mucha muher di 7 aña, e tabata hunto cu su ruman homber chikito pega bou di algun blokie, nan tabata tin como 36 ora pega, e mucha muhe tabata protega su ruman chikito. Despues cu a logra rescatanan, e mucha muhe a indica e team di rescate unda su mayornan ta pega y a logra sacanan tambe.
Na e cuidad Jinderis, Syria, entre e restonan di bloki y materialnan di construciona bin topa cu un baby recien naci. E baby tabata ainda pega na e navelstreng si su mama, ta supone cu ora e temblor a dal y e edificio a basha bou, e mama lo tabata dunando lus. E mama y henter e famia a fayece, e baby ta e unico cu a sobrevivi. E baby a wordo rescata algun ora despues cu e la nace, E la wordo interna na un hospital y ta den couveuse, segun dokternan si a tarda un poco mas e baby tampoco lo a make it.
Durante e trabounan di rescate a logra libera un cantidad di adulto y hopi mucha chikito for di bou di restonan di edificionan y casnan, pero lamentabelmente mas cu 11 mil persona ya caba a perde nan bida den e temblor fuerte aki.
