Durante su disertacion den reunion publico den Parlamento diamars 13 di December, Prome Minister Evelyn Wever-Croes a duna informacion amplio riba e investigacion di Arubahuis. Prome Minister a remarca cu tawata tin hopi interes politico tambe pa cu e tema aki pero e mes no por a bisa nada mucho detaya prome pasobra e investigacion tabata andando. Sinembargo, bou su peticion, a cuminsa un investigacion mesora y desde principio a compromete cu Parlamento pa e mes duna informacion na Parlamento. “Manera mi a bisa semper, esun cu a comete iregularidad mester carga su responsabilidad. Mescos cu den e caso akinan, pasobra ami ni ningun di nos coleganan y sigur no nos departamentonan ta akinan pa tapa pa ningun hende”, Prome Minister a enfatisa.
“E cosnan aki ta indigna mi pasobra nos a priminti cu nos no ta haci mescos cu e partido cu tawata na mando prome cu nos. Awe atrobe tin tratamento di caso Avestruz. Nos a promete cu nos no lo haci nada cu ta yega remotamente cerca di locual ta pasa den caso Avestruz, locual cu tabata pasa bou gabinete di Mike Eman. Sinembargo awor nos ta haya nos den un caso cu ta causa berguensa y indignacion y ta pone cu hende ta perde confiansa den politica y den gobernacion. Pero mi ta kere cu e hecho cu nos a tuma paso inmediantamente y nos mes a investiga, nos mes a tuma hende responsabel y a entrega e documentonan na Ministerio Publico, esey ta crea e confiansa bek den comunidad.
Si nos compara cu casonan di pasado manera caso Avestruz of caso Ibis, ni un dia Parlamaneto a haya informacion di e gobierno anterior riba e investigacionnan ey. Nos a pidi hopi biaha y nos no a haya. E tempo ey e gobierno na mando a sconde.
Pero e Gobierno aki a actua diferente ora cu nos a haya sa di algo iregular. Nos no a sconde pero nos mes a investiga. E tempo aya ora e investigacion den caso Ibis y Avestruz a caba, gobierno a defende y brasa esnan envolvi. E gobierno anterior a brasa corupcion. El a pidi pa laga e hendenan defende nan mes te den corte prome cu nos huzga nan. A nos den caso di Arubahuis nos ta bisa, cada ken mester carga su responsabilidad y nos a tuma e pasonan cu mester a tuma. Dus bo ta wak un diferencia di dia y anochi
Manera mi a bisa semper, nos lo ta hopi ‘naive’ si nos kere cu kiebro di integridad no lo pasa mas na Aruba pasobra e cos aki lamentablemente ta pasa y lo sigui pasa. Importante ta con bo ta reaciona riba dje. Con bo ta reaciona na momento cu bo nota cu tin kiebro di integridad. Bo ta brasa nan of sconde nan manera caso Ibis y Avestruz, of bo ta investiga y tene esnan envolvi responsabel pa nan actonan. Esey ta e diferencia grandi cu segun mi parecer ta trece mas integridad y mas confiansa den gobernacion. Pa bo tin un gobernacion cu ta traha di berdad pa integridad y responsabilidad.
Aruba ta den recuperacion aworaki, uno impresionante pa henter mundo, awor mas cu nunca nos mester pone atencion na e aspecto di integridad pasobra ora tin kiebro di integridad, hende ta perde confiansa y bo ta perde placa, e no ta bon pe comunidad. Si kier traha di berdad riba recuperacion, mester traha riba e fundeshi y pilar di integridad cu ta duna bo recuperacion real, Prome Minister Evelyn Wever-Croes a enfatisa.