Recientemente a inicia cu e di dos fase di e proyecto di Botica Aruba na Steenweg 19. Despues cu a tene un destaho a otorga e proyecto na Sumipet cu lo ehecuta e trabounan di renobacion na e interior di e edificio. Ta calcula cu esaki lo termina den e prome lunanan di 2023.
Asina e proyecto finalisa, e monumento aki lo tin un funcion nobo.
E piso abou lo keda converti den un restaurant bou di e nomber di KOAL.
Esaki lo ta e di tres funcion cu e edificio aki lo tin. Despues di tabata un Botica y vivienda den añanan ochenta e la keda converti den tienda di Palais Hindu na aña 1993. Pa hopi aña conoci bou di e nomber di El Mercado. Despues cu ‘El Mercado’ a cera su portanan e edificio a keda bashi te na 2015 ora cu Stichting Monumentenfonds a cumpra e edificio. Entre 2016 y 2019 BEAM a haci uzo di e edificio como un Atelier di arte. Na 2020 a inicia cu e proyecto di restauracion di e exterior.
Pa locual ta e prome piso ainda e espacio di 156 meter cuadra ta disponible pa huur.
SMFA ta den combersacion cu diferente interesadonan y ta spera di pronto por yega na un funcion nobo pa e parti aki tambe di e edificio. Pa mas informacion tocante huur por tuma contacto cu Stichting Monumentenfonds Aruba na [email protected]
E edificio na Steenweg, ta un monumento proteha cu a keda construi na 1925 pa Addison Winfield Croes. Hunto cu Gustave Nouel a cuminsa un di e prome boticanan riba e isla bou di e nomber di Botica Aruba na aña trinticinco.
Durante e restauracion a hiba e edificio bek na su forma original
den cual el a keda construi den añanan binti. Un monumento cu hopi detaye y decoracion cu a keda descubri durante e proyecto. Nos a logra restaura tur esakinan, habri e balcon di e edificio bek y trece bek e decoracionnan den estilo ‘gingerbread’ tanto na e bentananan como na e balcon.
Den e forma aki Stichting Monumentenfonds Aruba por garantisa cu e monumento di Steenweg lo tey pa futuro generacionnan por conoce tambe e historia di Botica Aruba.
