Home » Partido MEP: MIKE EMAN A FAYA UN BIAHA MAS

Partido MEP: MIKE EMAN A FAYA UN BIAHA MAS

by Admin
0 comment 68 views

El a perde control y autoridad di su partido poniendo duda den su liderazgo

Siman pasa, den Parlamento a tuma luga e tratamento di Presupuesto di pais Aruba. Durante un siman y mei tabata tin debatenan hopi intenso riba e tema importante aki. Ta trata di e cambionan di Presupuesto 2022 cu a pone cu Aruba no mester a haya un aanwijzing mas y e Presupuesto 2023 den cual Gobierno a presenta un surplus di 63 miyon florin.

Partido MEP a tuma nota cu un biaha mas durante e debatenan aki, Mike Eman tabata completamente ausente. Esaki sigur ta algo di lamenta y algo cu nos pueblo no por sigui acepta di e lider di AVP.

Por a tuma nota tambe cu den cierto debatenan si Mike Eman a instrui algun di su parlamentarionan pa papia pe entre otro Mervin Wyatt-Ras y Ryçond do Nascimento. Pero tawata obvio cu ambos parlamentario tabata sinti nan mes sumamente incomfortabel specialmente ora Paralmento tabata hiba debate riba e caso Avestrus. Nan tabata nenga di duna nan opinion riba e caso y a sali na defensa di Benny Sevinger. Parlamentario Ryçond a bay asina leu di ataca Ministerio Publico y esaki pa un hurista ta algo hopi remarcable pasobra como hurista bo sa cu bo no por ataca Ministerio Publico.

Pero esun cu a faya un biaha mas y tabata ausente, ta Mike Eman. Esaki a trece mas duda den su liderazgo. Ta obvio cu Mike Eman a perde control di su partido, a perde autoridad cu e tin den su partido y cu AVP ta un partido kibra. Un partido sin moral y un partido perdi. Tur ta haci cosnan na nan manera y Mike no por gara e liderazgo di e partido bek.

Partido MEP na Mike Eman: “Durante tratamento di presupuesto di pais Aruba, abo como lider di oposicion mester tey pa bo controla Gobierno y pa bo trece bo preocupacionnan cu bo tin pa cu pueblo di Aruba. Si bo tin preocupacion pa calidad di bida di ciudadanonan, pa situacion financiero di pais Aruba, pa cu corupcion den e pais, esaki ta e momento pa bo, como lider di oposicion, cuestiona esakinan den reunionnan den Parlamento”.

Sinembargo, Mike Eman no a bay Parlamento niun dia pa cuestiona nada. Partido MEP ta di opinion cu esaki por ta debi na dos cos. Berdad Mike Eman a perde su liderazgo y su autoridad pa papia of Mike Eman a realisa su eror di brasa Benny Sevinger y sostene corupcion. Na mas di un ocasion a ser expresa pa recorda Mike Eman y AVP, cu ora bo ta brasa corupcion, esey ta haci bo mas corupto cu Benny Sevinger mes.

Tur hende por mira cu AVP ta pasando den su peor momentonan y sigur Mike Eman cu a comete e eror di brasa corupcion. E pregunta ta dicon? Dicon Mike Eman, lider di un partido cu un tempo tabata un partido grandi y prestigioso, 2 biaha prome minister di nos pais, un politico pa hopi aña, dicon e ta dispuesto di laga ful su carera politico bay pa Benny Sevinger.

Pregunta ta bay na otro parlamentarionan di AVP tambe. Dicon Parlamentario Mervin Wyatt-Ras ta permiti nan lastra su nomber den e lodo di corupcion door di Benny Sevinger. Con Parlamentario Gerlien Croes, studia den ley ta permiti su integridad y reputacion wordo lastra den lodo door di Benny Sevinger.

E preguntanan aki mester wordo contesta pa cada un di nan. Hopi speculacion tin riba e cartel di corupcion den AVP y e hecho ta cu Benny Sevinger a laga sa cu si e mester bay prison ta tur e lo hiba cu ne. Pero ta e politiconan mester sali y bisa dicon nan ta permiti nan mes pa wordo lastra y ofendi dijes pa defende un colega cu ta un acusado di corupcion kende a casua un indignacion hopi grandi na Aruba.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio