Home Politics Parlamentario Ricky Hoek (MEP): E motibo pakico Marisol kier elimina DIP...

Parlamentario Ricky Hoek (MEP): E motibo pakico Marisol kier elimina DIP – Parti 1

SHARE
Parlamentario Ricky Hoek

Pa elimina tur evidencia di caso kukwisa kisas?

Durante di e tratamento di presupuesto 2023 di pais Aruba, pa ta exacto riba dialuna 14 di November ultimo, mi persona a entrega un mocion riba 3 punto specifico: 1) pa traha un plan di con lo elemina e atrasonan den e diferente producto y procesonan cu DIP ta encarga cun’e, 2) mester pone enfasis special riba terenonan cu ta destina pa agricultura y cria di bestia, pa asina e sector perimario por funciona mas optimal, 3) por ultimo, pa gobierno por informa Parlamento di e avancenan den ehecucion di e plan aki riba regular.

Ta interesante pa nota con Partido MAS a vota contra di e mocion aki y specialmente e lider Marisol Lopez-Tromp a anuncia publicamente cu: “e departamento mester wordo ‘opgeheven’, esey ta un proposicion cu mi a haci tambe dos aña pasa. Hef e op y lanta algo nobo”. Awo e pregunta ta, abase di kico Marisol kier hef op DIP anto?

E motibo pakico Marisol kier hef op DIP
E prome motibo ta, pasobra Marisol supuestamente no tin niun creencia mas den Minister President cu pa 2 aña largo a ‘depolitisa’ e departamento y cu no a wak ningun cambio den e departamento. Sinembargo, cu e caso Avestrus cu Ministerio Publico ta bezig cune, poco por wordo haci pa asina facilita e procesonan den e departamento. Pero e motibo principal ta e staff (di tempo di Marisol y parcialmente esun actual) di DIP cu a wordo instala pa partido POR. Na cabes e tempo ey tabata Otmar Oduber y despues Marisol cu a continua cu e proceso aki. Di e forma aki Marisol a forma e ‘ekipo perfecto’ y hinca esaki den dicho departamento pa asina e ‘ekipo perfecto’ aki ehecuta su instruccionnan den e departamento encarga cu infrastructura di nos pais. Lider di MAS a bisa tambe, cu e a stel in algun investigacion den DIP tempo cu e tabata tin e cartera di infrastructura bou di dje. Pero cu nunca mas esakinan a keda finalisa pa Minister President y tampoco no a wak niun resultado di e investigacionnan.

Desde cu Marisol no ta minister mas y investigacion di caso Kukwisa a cuminsa na DIP, cierto hendenan cu ta traha na DIP a wordo interoga pa Lands Recherche, entre otro Marisol Lopez-Tromp mes. Despues di esaki, diripiente Marisol kier bay contra elimina atrasonan den DIP, y preferibel kita tur hende na DIP y hef op e departamento. Dicon? Dicon si ta su mesun hendenan cu e a pone den DIP pa sigui su instruccionnan y awo e kier kita nan? Ta pasobra cu nan a testigua den caso Kukwisa contra dje?

Marisol y e casonan Avestrus y Kukwisa
E parlamentario aki cu tin 25 aña den politica, niun dia a sali bisa ni publicamente ni den sala di parlamento cu e ta condena e caso Avestrus. Marisol tabata un ex-minister di Infrastructura na 2 ocasion y conoce e procesonan di DIP bon. Benny a denunci’e na Ministerio Publico pero e no a reacciona mes. Y den media tampoco e ta papia di e caso Avestrus, si ta su intencion anto pa hef op DIP pa mustra cu di berdad e departamento mester di un renobacion total. Pero e parlamentario ta scoge di keda keto pasobra si e bisa ‘A’ di caso Avestrus, e mester bisa ‘B’ di caso Kukwisa. Na final e lo logra hef op DIP y elimina tur evidencia di caso Kukwisa?