Home » Minister Ursell Arends:  Miguel Mansur ta politico tradicional cu bachi nobo

Minister Ursell Arends:  Miguel Mansur ta politico tradicional cu bachi nobo

by Admin
0 comment 111 views

Diaranson Minister Arends a yama parlamentario Miguel Mansur pa bin den Staten pa e mira tur e documentonan di e papelnan di screening di e ministro. Esaki pa motibo cu Mansur publicamente a declara cu tin algo di sconde. Pa mustra cu e declaracion di Mansur ta falso, Minister Arends a pone tur documento disponible. Mansur a prefera pa no bin mira e documentonan y cera conoci cu e realidad. 

 

E siman prome e Parlamentario nobo y “relativamente” hoben tabata presente na un programa di entrevista y a scohe pa duna comentario negativo y completamente falso den direccion di Minister Arends. E parlamentario aki cu ta conoci pa su atakenan personal riba tur hende, tanto politico y no-politico, awo a scohe un ruta nobo y peligroso.  Loke ta remarcabel no ta e nivel di tradicionalismo cu ela adapta den su strategia. Remarcable ta cu awor Mansur no ta trose berdad, pero ta simplemente inventa storia y pusha esaki den publicidad. Esaki apesar di ta proclama su mes como parti di “e generacion nobo di politica”.  

 

Mansur a inventa un storia bisando cu minister Ursell Arends lo no a haal su screening. Mientras cu politica tradicional ta conoci pa trose berdad, e politica nobo di Miguel Mansur ta pa simplemente lansa mentira y calumnia y storianan sin ningun base.  E lider di Accion21 cu tin 12 luna ta lamenta cu e no por ta forma parti di Gobierno, pero mirando su preferencia pa calumnia y negativismo, esaki realmente a resulta un bendishon pa tur hende. 

 

Ta decepcionante con un politico nobo cu lo mester para pa respet, pa transparencia y sigur pa participacion awor ta baha na nivel di traha storia falso. Ta tristo cu ora cu ta pone documento pa e mes por bin mira e realidad cu su propio wowo, e ta nenga di bin mira. Como un lider hoben den politica ela priminti di duna aliento na bo comunidad pa medio di union, contructivismo y participacion activo. 

 

Durante tratamento di presupuesto 2023, Minister Ursell Arends, a pone su screening di minister completo ter inzage di tur Parlamentario y call-out Mansur na su nomber, pa ofrece oportunidad pa un “persoonlijke feit”, asina e por bin aparece den sala di parlamento. E parlamentario tabata presente den edificio di parlamento pero lamentablemente no tabata tin e decencia di presenta pa mira e documentonan en cuestion. Presidente di Parlamento a indica cu Mansur tin henter dia pa presenta den sala y tuma nota di e documentonan. E tratamento di presupuesto a dura largo y ningun momento Mansur a haci acto di presencia. 

 

Como hende bo mester tin e caracter pa para pa loke bo bisa publicamente y ora bo ta robes bezig bo mester por coregi bo mes. Ora nan retabo cu e berdad bo mester por enfrenta esaki tambe. Parlamentario Mansur ta conoci pa haci hopi pregunta, no semper relevante, pero ta cuestiona su participacion constructivo. Enfasis regularmente ta pa crea sensacionalismo y pidi pa atencion door di lanta stof. Ta parce cu Mansur ta mas interesa den trece un nivel nobo, pero den politica tradicional. 

 

“Mi ta respeta cada persona y partido su decision pa campaña na cualkier momento cu nan kier,” minister Arends a bisa, “Pero insinuacionan no funda y lanta falso testimonio cu ta toca mi persona y mi famia tin un limite. No por ta asina cu bo ta “brand” bo mes como politica nobo recuriendo na accion cu ta peor cu politica tradicional mes.” 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio