ORANJESTAD – Diahuebs mainta minister di Turismo y Salud Publico, sr. Dangui Oduber, a duna inicio na e programa di “Kwaliteitsinstituutzorg” cu diferente stakeholders den e ramo di salubridad. E dia aki ta sumamente importante, mirando cu hunto cu tur stakeholders’ den salubridad, lo bay tuma decisionan importante riba e eficiencia y e efectividad di e calidad di cuido na Aruba. E instituto aki ta parti di e trayectoria di e “Landspakket Zorg”, conoci como F3. Manera ta conoci, desde mei di aña 2020 a haci diferente palabracionnan cu Gobierno di Hulanda riba e parti di cuido na Aruba. Esaki ta relaciona cu e fiansa cu Aruba a ricibi for di Hulanda durante pandemia.
E meta di e instituto aki ta pa mehora e calidad di cuido na Aruba, pero tambe pa ofrece mas eficiencia y resultado pa tur ciudadano. E instituto aki ta un instituto na prome lugar, di control di calidad di cuido, pero tambe cu e meta pa mehora coordinacion, comunicacion y acuerdonan pa locual ta trata cuido medico. Ta importante pa enfatisa cu e esaki lo wordo hasi den cooperacion cu tur e paisnan den Reino, pa asina por tin igualdad y nivel di calidad den e sector di salubridad simultaneamente pa tur pais den Reino Hulandes.
E instituto aki lo tin diferente obhetivo, entre otro e supervision di e mercadonan di salud como tambe cualkier desaroyo nobo (ZiN/Nza). Tambe lo focus riba e regulacion di diferente tarifa y e resultadonan di e regulacionan aki. Un otro tarea cu lo cay bou di e instituto aki ta pa monitorea e ehecucion di LAZV, LABIG como tambe Art.3 di Landsverordening verzorgingshuizen. Den cuadro cu e pandemia y e fiansa cu Aruba a haña for di Hulanda, tin hopi decisionan dificil cu lo mester wordo tuma pa locual ta trata e recorte den sector di cuido. E instituto aki lo yuda guia e decisionan aki abase di diferente experto cu experiencia den e areanan aki.
E meta ta pa Aruba yega na un cuido mas eficiente, mas efectivo y naturalmente mucho mas sostenibel. Minister Dangui Oduber ta gradici tur stakeholder cu a hasi e logro aki possibel na Aruba, pero tambe na tur pais cu ta forma parti di Reino Hulandes. E mandatario su meta ta pa “E dia di awe ta uno fructifero yena cu exito, pa nos yega na e metanan nos dilanti, y hunto logra progresa y mehora e servicio y cuido pa tur nos ciudadanonan na pais Aruba”.
