Den e siman di Aruba Art Fair 2022, Minister Maduro di Cultura tabata presente na e ‘fashion show’ ‘Climate meets Fashion’. Un show na unda cu diseñador- y talentonan local como tambe internacional a sa di luci den Caya Principal di San Nicolas cu a fungi como pasarela pa e evento unico aki.
Durante e show a pone enfasis riba e importancia di cuida nos medio ambiente. Esaki a duna e anochi aki un balor agrega mirando cu e parti aki ta hopi importante pa nos como pais y mundo henter bira mas consciente di dje. Nos mundo ta cambiando y nos como isla chikito tambe ta sinti e efectonan di e cambio aki. Ta p’esey ta asina importante pa para keto y bira mas consciente di e cuido cu nos medio ambiente ta rekeri pa asina nos por preserva nos isla pa nos como habitante, pero tambe pa esnan cu ta bishita nos.
Minister Maduro ta gradici sr. Tito Bolivar y full e team di Aruba Art Fair 2022 pa e bunita organisacion di e show di moda y tur actividad den e siman na unda arte y cultura a domina den e cayanan di San Nicolas. Masha danki pa kere den Aruba.
