Home Politics Minister Ursell Arends Serlimar SG ta conoce su director nobo

Minister Ursell Arends Serlimar SG ta conoce su director nobo

SHARE

Minister Ursell Arends ta anuncia cu Raad van Toezicht di Serlimar SG a nombra sra. Melitza Geerman como e director di Serlimar entrante 1 di november 2022.

Despues di a pasa un proceso di solicitud e escohencia di e Raad van Toezicht a keda den sra. Geerman. Sra Geerman tin un Bachelor’s Degree den Business Administration, un Minor degree den Human Resources Management & Organization Development, y Economics. Alabes e tin trayectoria amplio den sector priva, unda e la fungi den diferente funcionan clave tanto den management y marketing. Su funcion mas recien ta di Head of Commercial/ Territory Manager Aruba na Superior Tobacco Aruba N.V. afilia na Philip Morris International.

Serlimar ta den su momentonan crucial, cu retonan hopi grandi y alabes posibilidadnan real pa cambia e rumbo unda e patrimonio di Aruba ta bayendo.
Minister Arends: “Di mi parti mi tin e pleno confianza cu señora Geerman tin tur e competencianan necesario pa dirigi Serlimar den rumbo pa un compania financieramente fuerte.”
Minister ta extende su palabra di gradicimento na sra Madeline Lacle como director interino den su esfuerzo y tareanan desplega den temporadanan hopi dificil di e compania.

E deseonan di tur clase di exito na sra Geerman, un yiu di tera, cu a demostra di tin e curashi pa acepta e reto y asina implementa e cambionan necesario pa salvaguardia y enforsa e existencia di Serlimar.