Avenida Nelson O. Oduber, Bubali: Diaranson den careda di 7’or di mainta a sosode un accidente riba Avenida Nelson O. Oduber un poco panort di e rotonde Superfood.
Un Nissan Skyline preto maneha pa un cabayero tabata bayendo direccion di e rotonde (direcion zuid) y na dado momento e chauffeur pa un of otro motibo lo a perde control cu su auto, a baha caminda y a bay cay den Bubali plas. E chauffeur no a resulta herida.
Prome cu e auto a bay full bou awa, e chauffeur a logra sali for di e auto y tambe a saca su pertenencianan for di den e auto. Aparentemente e chauffeur lo ta un fotografo, por a mira camara, lens y hopi mas, poni pafo di e auto.
Polis a yega na e sitio y a papia cu e chauffeur. Pa motibo cu ta trata di un accidente den cual ta un auto so ta envolvi y no a haci daño na otro, e chauffeur mester a percura pa busca un takelwagen y saca su auto for di Bubali Plas.
