Cu a tuma luga durante un evento combina cu e entregamento di premio pa e pinturanan ganado di e concurso di pinta y kleur “Ley di Cacho” 2022
Diamars 4 di October, riba Dia di Bestia 2022, a tuma luga na Bestuuskantoor entrega di premionan di ganadonan di e concurso di pinta y kleur “Ley di Cacho” 2022, organisa pa e Comision Plan Nacional cu ta atende cu e problematica di cacho. Durante e evento combina tambe a tuma luga e emision di e stampianan nobo di Post Aruba NV en conexion cu Dia di Bestia. Un total di 1218 mucha a participa e aña aki mustrando asina e conscientisacion cu cada mucha ta obtene tocante e cuido debido pa nan mascotanan.
Gobierno di Aruba desde mas cu un aña ta trahando cu Post Aruba NV pa hunto pone atencion na e problematica di cacho riba caya. Esaki a culmina cu riba dia di bestia ultimo, Post Aruba NV a emiti su serie di stampia titula “Love Your Dog” cu pintura di nos muchanan. Na 2021 a tene un concurso di pintamento “Stima Bo Cacho” caminda mas cu 1000 alumno di scol basico a participa cu e temanan: Baña bo cacho, Bo cacho como parti di bo famia, Cana cu bo cacho na leash, y Hunga cu bo cacho. E pintura di e 4 ganadonan awor ta riba stampia oficial y lo biaha rond di mundo. Asina nos ta mustra cu nos ta un pais cu ta conscientisa e comunidad pa stima tur mascota. E emision di e stampianan aki ta acompaña pa un envelop Prome Dia di Emision, pues diamars ultimo Gobierno a ricibi e prome stampia cu su stempel “Aruba 4 oktober 2022, Eerste dag van uitgifte”.
“Asina nos ta mustra cu nos ta un pais cu ta stima su mascotanan y ta conscientisa cuminsando na nos muchanan e importancia pa cuida mascotanan. Post y stampia no ta conceptonan cu nos muchanan ta custuma cu ne pero e ta na nos pa inculca esaki den nan. Mi ta hopi contento y orguyoso cu mi por tabata parti di esaki. Danki na e comision di e Plan Nacional pa organisa esaki un biaha mas y danki na Post Aruba NV pa boso cooperacion”, Prome Minister a expresa.
