“Mirando e pasion cu boso tin pa boso trabou, mi tin tur confiansa cu e proyecto aki lo ta un exito”
ORANJESTAD – Gobierno di Aruba hunto cu Cede Aruba y tur e directivanan di Centro di Bario a bini hunto den cuadro di e proyecto “Veilige Barios” pa firma un MOU na unda cu gobierno lo percura pa ehecucion di e proyecto aki.
Pa Gobierno di Aruba e proyecto “Veilige Barios” ta sumamente importante pa cu desaroyo di pais Aruba y por lo tanto a aloca fondo adicional pa e proyecto aki por wordo ehecuta. Gobierno tambe a acerca Cede Aruba como partner strategico mirando cu nan meta primordial ta pa trece recurso hunto y percura pa desaroyo sostenibel. Tambe a acerca e Centro di Barionan ya cu e proyecto aki ta pa amplia e actividadnan den bario pa asina crea mas oportunidad pa e cuidadanonan den e diferente barionan di Aruba.
Prome Minister Evelyn Wever-Croes tambe tabata presente na momento di firma e MOU y a expresa di ta sumamente contento cu realisacion di un proyecto asina importante pa Aruba su desaroyo. Specialmente mirando cu e proyecto aki lo beneficia esnan cu mas a wordo afecta durante e pandemia di Covid-19, cu ta e muchanan, nos grandinan y e hende muhenan.
Prome Minister den nomber di gobierno di Aruba a gradici tur esnan presente pa nan colaboracion y cooperacion pa Aruba por a yega na un proyecto asina bunita. El a gradici specialmente Minister Rocco Tjon pa a logra haci e poyecto di “Veilige Barios” un realidad, pero tambe Minister Endy Croes y Minister Ursell Arends cu a colabora cu fondo di nan ministerio pa haci e proyecto aki posibel.
Por ultimo, Prome Minister a gradici Cede Aruba cu semper, na momento cu gobierno asercanan, sa di coordina e esfuersonan den un forma constructivo y positivo. “Mirando e pasion cu boso tin pa boso trabou, mi tin tur confiansa cu e proyecto aki lo ta un exito” Prome Minister a termina bisando.
