Red Democratico/Rudy Lampe: SKOA ta bolbe perde caso y ex minister Lampe ta bolbe haya razon

Dia 5 di oktober 2022 tabata tin sentencia den corte cu un trahador di limpieza a entama contra SKOA. E trahador ta miembro di SEPPA y e sindicato a busca mi abogado, mr. E.E. Rosenstand, kende ya a gana dos caso contra SKOA pa loke ta e asunto di werksters. Tur hende ta corda con ex minister Lampe a wordo tilda di ta anti werkster, anti sindicato, anti SKOA. Pero awe pa di tres biaha huez ta bisa cu SKOA ta wrong, y nos tur sa wrong and strong.
SKOA contra ley y riba su mes a cuminza paga for di 2015 e e trahadornan di limpieza como si fuera nan ta ambtenaar. Ex minister Lampe a mustra SKOA cu niun hende ta para riba ley y hueznan a dune razon dos biaha caba y toch SKOA a keda actua contra ley. Prome minister E. Wever-Croes a priminti SKOA cu e si lo fix esaki, dos dia prome cu eleccion. Minister nobo di Educacion, sr. Endy Croes, a bisa cu e lo regla esaki den 30 dia di gobernacion nobo. Wel un aña a pasa y ni MinPres ni sr. Croes por a regla nada, y SKOA a bai over na corta e salario di werkster segun status di ambtenaar y paga e salario conforme ley.
Wel mundo ta dal vuelta. SEPPA cu tanto a pinta ex minister Lampe como e boeman contra e werksters, ta pidi abogado di ex minister Lampe pa defende e werksters. Huez awe ta dicta na favor di e trahador di limplieza, cu e tin verworven rechten, y cu SKOA mester keda paga e werkster e salario di for di 2015 y no por corta unilateralmente den e salario. SKOA ta e dunador di trabao y no gobierno. Ke men SKOA, segun e sentencia mes ta menciona, lo mester bai aumenta e schoolgeld pa por cubri e extra gasto aki. Ya cu gobierno, esei tambe ta para den e sentencia, a comunica na SKOA cu gobierno lo subsidia conforme e sentencianan cu ex minister Lampe a gana, esta conforme ley. Pues SKOA tin cu scupi awor e restante, mientras cu SKOA caba tin solamente na Belasting so, según ta para den e sentencia, un debe atrasa di riba 5 miyon. Ke men SKOA su problema financiero a bira pio despues di e sentencia di 5 di oktober.
Si SKOA disidi pa kita e trahador pa motibonan economico (SKOA a bisa huez cu e lo meter kita 30 trahador di limpieza) e ora den e siguiente 6 luna e no por contrata otro werkster sino esun cu a wordo kita foi trabao. Si e kita nan toch e ora e no por cumpli cu limpieza di scol y e ora Inspectie lo raporta cu SKOA ta viola e tres Landsverordeningen di peso en cuanto educacion. Ke men SKOA a hinca su mes den un hanchi sin salida dor di gasta placa di pueblo contra ley. Y esei mi a spierta SKOA pa su mesun bon pa e coregi e situacion. Pero no, maestronan, trahadornan, sindicatonan hunto cu SKOA a manifesta na tur scol y a bai bisti na preto contra ex minister Lampe. Awe e realidad ta dal den nan cara cu nan a perhudica nan mes.
Mi tabata testigo con SKOA a humiya mr. Rosenstand y awe e abogado den nan wowo mediocre aki ta gana Skoa den corte pa di tres biaha. Driemaal is scheepsrecht. E directiva di SKOA, Raad van Toezicht y Bestuur, mester entrega nan retiro, pasobra e crisis financiero aki di SKOA lo hiba docentenan, trahadornan y mayornan den un abismo. SKOA ta practicamente bancarota. Ta dos caminda e tin y tur dos ta inhusto. Hisa schoolgeld ta inaceptabel, no por laga mayornan paga pa e mal maneho di SKOA. Hisa subsidio di gobierno tambe ta inhusto, pakiko hinca plaka di pueblo pa tapa mal maneho di SKOA. For di 2018 mi a propone un solucion pa e no tin cu yega asina leu, pero ni SKOA, ni MinPres, ni Parlamento, ni sindicato kier a scucha.