Arte y cultura tambe ta un forma pa atrae turismo pa Aruba
Na ocasion di bishita di Minister Maduro di Cultura na e atalier di e artista Arubiano Gilbert Senchi na Bogota, sra. Miriam Dabian directora di ATA pa Latino America tabata presente y a percura pa prensa na Colombia tambe wordo poni na altura di e trabou nan cu ta wordo haci pa integra mas arte publico na ‘La isla Feliz de Aruba.’
Turismo ta diversificando y e turista cu ta bishita Aruba mas y mas ta busca pa haya sa mas di e historia y e cultura di nos Pais. Pa e motibo aki na ocasion di e bishita di Minister Maduro na e atalier di e artista Gilbert Senchi, a invita sra. Miriam Dabian pa asina ATA Latino America tambe por haya sa mas di e trabounan cu ta wordo haci pa integra mas obra di arte publico na Aruba.
E obra ‘Driekel’ cu proximamente lo bay dorna un retonde den e area turistico di nos Pais, ta un obra di arte publico cu ta conscientisa nos y brinda honor na tur esfuerso cu ta wordo haci pa proteha e Driekel cu ta scohe Aruba pa bin traha su neishi y pone su webonan. E Driekel tur aña ta biaha miles di miya pa bin Aruba y ta nos Pais su promer ‘repeat visitor.’ Pa e motibo aki e obra di arte publico ‘Driekel’ ta brinda honor y gratitud tambe na tur turista cu ta bishita nos Pais tur aña.
Minister Maduro ta gradici sra. Miriam Dabian y staf di ATA Latino America hunto cu reportero di El Tiempo pa tabata presente na ocasion di e ‘private viewing’ di e obra Driekel. Arte y Cultura tambe ta un forma pa atrae turismo pa Aruba y e mandatario ta contento di por a comparti informacion riba e plannan pa integra mas arte publico na encanto di turismo na Aruba.
FIN