Home Politics Parlamentario Shailiny Tromp-Lee (MEP): Diferente caminda den Noord lo bay haya e renobacion...

Parlamentario Shailiny Tromp-Lee (MEP): Diferente caminda den Noord lo bay haya e renobacion necesario

SHARE

 

 

Durante tratamento di presupuesto di DOW un biaha mas, manera semper mi a duna atencion special na e condicion di e careteranan di mi districto di Noord.

 

Durante e reunion publico mi a indica cu mi ta super contento cu trabounan di mantencion a tuma lugar riba algun careteranan principal den Noord. Un necesidad cu mi tin hopi aña ta bin ta indica. Un caminda cu a cuminsa cu ne ta esun di rotonde MFA Noord direccion Westpunt, un caminda principal y hopi importante, cu sigur tabata rekeri di un mantencion. E fase te cu Café 080 a keda finalisa y sigur a trece e alivio necesario. Gobierno a informa cu pa 2024 lo sigui cu e caminda principal aki cu ta bay te cu Westpunt. Fondonan ta limita pero contrario na 2020, 2021 y 2022 pa 2023 en adelante si Gobierno lo pone fondo pa mantencion di caminda.

 

Otro caminda cu ya pa algun aña mi ta pidi atencion pe pasobra e ta rekeri di atencion urgente, ta esun banda di nos high rise hotel. Den pasado Gobierno a indica cu ta den combersacion cu AHATA y demas stakeholders. E caminda aki ta den un estado basta malo y no por sigui pospone su renobacion. Banda cu e ta un caminda principal, e ta un di e caminda mas uza pa nos turistanan cual sigur por impacta con nan ta experiencia nos isla. Gobierno a indica cu e caminda aki tin prioridad na e momentonan aki, y e proyecto ta pa 95% cla. Intencion ta pa cuminsa na 2023 cu ne, unda lo drecha e caminda, pone trottoir, iluminacion y traha riba e riolering. Stakeholders y AHATA ta involucra den e proyecto.

 

E caminda di Frans Figaroa pa Superfood ta un otro caminda cu mester di su atencion. E ta un ader principal di Noord cu alabes ta un conexion importante cu Sasaki. Gobierno a informa durante e reunion publico cu e caminda aki tambe ta riba planning pa 2023.

 

Mas cu claro durante e reunion mi a accentua cu mi ta hopi contento cu e crusada na Wendy’s Palm Beach, cu a sera dia 7 di augustus di 2020, a keda comberti den un retonde. Diabierna siman pasa el a habri parcialmente pa nos automobilistanan y pa dia 23 di september e lo habri completamente. No obstante e hecho cu mi ta consciente cu Aruba su fondonan ta limita y cu embeyecemento sigur no ta un prioridad a sugeri na Gobierno pa conhuntamente cu por ehempel sector di horeca yega na un manera pa hunto haci algo bunita cu e retonde importante aki. Gobierno a indica cu mediante di Minister Maduro ta trahando riba e posibilidad di pone un obra di arte di un artista aki.