Home Politics Parlamentario Shailiny Tromp-Lee (MEP):  Cu palabra di elogio pa AVB cu...

Parlamentario Shailiny Tromp-Lee (MEP):  Cu palabra di elogio pa AVB cu nan Award Night y felicitacion na tur nominado, ganador y clubnan cu a haya un homenahe 

SHARE

 

 

Sigur p’ami tabata un honor di por a forma parti di e Award Night di AVB cu a tuma lugar diabierna ultimo na Cas di Cultura. Un anochi di gala caminda e for di e caranan di e nominadonan bo sa cu nan ta sinti nan mes orguyoso. Un anochi hopi bunita. Durante e Award Night Arubaanse Voetbal Bond a reconoce e hungadonan for di categoria U-9 Plata te cu Division Honor. Tambe a reconoce coach y refereenan cu mas a destaca den e Campeonato 2021-2022. 

 

A tocami e honor di, hunto cu presidente di AVB, duna homenahe special na 4 Club Miembro cu a cumpli 75 aña of mas. E 4 Clubnan aki  ta S.V. Racing Club Aruba, S.V. La Fama, S.V. Bubali y S.V. Dakota. Un pabien na cada un di nan. Tambe mi a hiba palabra caminda mi a felicita AVB cu nan celebracion di 90 aña y a elogia nan cu e anochi bunita y importante aki. Mas cu claro a felicita tambe tur nominado, ganador, club y tur esnan cu a ricibi un reconocemento. Mi a tuma tempo special pa gradici tur boluntarionan cu ta traha pa AVB of pa e clubnan deportivo cu ta inverti nan tempo personal y familiar den trabounan boluntario asina importante pa cu desaroyo deportivo di nos mucha y hobennan. Un trabou valioso cu mester keda reconoci y aplaudi. 

 

Durante mi speech mi a subraya, manera semper, e importancia di formacion deportivo como parti di e formacion total di un ser humano. Mediante deporte nos ta logra inculca y desaroya aspectonan asina importante pa un ser humano por ta exitoso den bida y por bira un futuro lider. Un aspecto cu a impreciona mi e anochi aki ta e documentacion cu AVB ta bezig cu ne di nan federacion. E historia di AVB, di nan lider y boluntarionan, di nan hungadornan. Mi ta sigur cu esaki lo ta di un balor imenso pa loke ta trata nos herencia deportivo. Mas y mas nos mester incentiva e parti di documentacioin di nos historia. Asina nos por logra salvaguardia nos herencia pa future generacionnan.

 

Mi ta termina felicitando AVB cu un anochi bon hinca den otro y cu a cana hopi bon mes. Pabien na full e comision organisado. Mi ta spera di curason cu nan ta sigui cu e Award Night tur aña.