Fiscal a exigi 5 aña di prison pa homber cu a tira otro den cara

ORANJESTAD – Awe mainta e homber J.K.L.(21), a presenta den Corte pa e caso penal cu Ministerio Publico a cuminsa contra dje.

ARUBANATIVE por a compronde cu Fiscal a exigi 5 aña di prison pa J.K.L. cu a tira e homber W. den cara cu un revolver. Abogado mr. Mohamed a bisa Hues cu aki ta trata di un caso di defensa propio, pasobra ta W. a bay habri porta di auto di J.K.L. y J.K.L. den su spanto a coy e arma y tira.

TIRA HOMBER DEN CARA

E acusacion di Fiscal contra J.K.L. ta cu riba 13 di Februari 2022 el a purba di mata e homber W. door di tira den su cara. Tambe Fiscal ta acusa J.K.L. di posecion di un arma di candela.

Den sala di Corte tabata presente familiarnan di J.K.L. y un familiar di e victima, kende a representa e victima y presenta demanda di daño.

Hues a bisa cu dia 13 Februari 2022 Polis a haya informacion di un tiramento na un fiesta na Bluemoon. A resulta cu ta J.K.L. a tira e ruman homber di e homber J.W. den cara. Hues a puntra J.K.L. pa e conta kico a sosode. J.K.L. a bisa cu el a mira e dos rumannan W. den e club y el a sigui su caminda. Ora el a sali pafor, el a mira J.W. ta discuti cu amiga di J.K.L., kende tabata ex amiga di J.W. Ora cu J.W. a bay for di e amiga, J.K.L. a bay serca e amiga pa sa kico a pasa. E amiga a bisa J.K.L. cu J.W. a bis’e cu J.K.L. ta hende kens. Segun J.K.L. el a cana bay pa su auto y J.W. tabata haci señal cu su mannan pa nan bay bringa. J.K.L. a hari y a subi su auto hunto cu su amigo. El a sali for di parkinglot y para patras di auto di su amiga. E amiga tabata papia cu J.W. pa stop di busca problema. Segun J.K.L., el a scucha J.W. bisa e amiga cu si e kier e saca J.K.L. for di auto y bati’e. E amigo di J.K.L. a baha for di auto pa bay serca su amiga y e amiga di J.K.L. drenta den auto di J.K.L. Segun J.K.L. e momento ey el a mira e dos rumannan W. a core bin riba su auto. E ruman di J.W. a habri e porta di auto na banda di J.K.L. pa dal’e cu un boter y J.K.L. a pasa man pa un arma y tira. E tiro a alcansa e ruman di J.W. na su cachete. J.K.L. despues a tira e arma, un revolver, afor.

Hues a mustra cu e ruman homber di J.W. mes a declara cu e tabata cu su ruman. E ex amiga tabata eynan. J.K.L. tabata cu un amigo S. Segun e ruman di J.W. , el a bay pa bisa J.K.L. pa nan ta chil pero J.K.L. tir’e cu revolver y bala a pasa door di su cachete y bay den nek. E ruman tabata sangra masha hopi y a wordo hiba hospital. Dokter a logra saca e bala for di nek. Cirugano a bisa cu e bala a afecta un arteria robez di garganta y mester a opera di biaha. E ruman di J.W. a keda den cuido intensivo 2 dia y despues e por a bay cas. E ruman di J.W. a bisa cu e no tin problema cu J.K.L. y a bay serca dje pa bis’e pa bay cu e ex amiga for di eynan. El a bisa cu J.K.L. por poco a mat’e.

J.K.L. a declara cu e lo bay Hulanda pasobra J.W. y su ruman a menaza di tuma revancha.

MENAZA

Raport di Reclasering ta mustra cu J.K.L. tin bon relacion cu su famia. Desde cu e ta cu e amiga, varios biaha caba el a wordo menaza cu arma door di e grupo di J.W. Pesey aña pasa October 2021 el a cumpra un arma. E ta arrepenti loke a sosode y pesey e kier bay Hulanda pa evita mas problema. Hues a puntr’e, cuanto bala tabatin den e arma. J.K.L. a bisa Hues cu e no sa y cu e no sa mes con ta traha cu e arma.

DEMANDA DI DAÑO

E familiar di e victima a presenta den Corte pa haci demanda di daño. Hues a remarca cu si e ruman no tin AZV. E familiar a splica cu Hospital a manda cobra algo mas di 28 mil florin. El a a bisa cu tin un problema si e ruman ta cay bou AZV of no. Hues a bisa cu mester tin un decision definitivo si e ruman ta cay bou AZV of no. Si e ta inscribi na Aruba ora el a bin for di Hulanda, e ta cay bou AZV. No tin un claridad ariba esey.

EXIGENCIA FISCAL

Fiscal a bisa cu e ta haya legalmente proba cu J.K.L. a tira e ruman homber di J.W. Tin raport di dokter cu ta mustra con a bala a pasa door di cachete y bay den nek. Tambe tin e declaracion di J.K.L. mes cu el a tira. Fiscal a bisa cu J.K.L. a bisa cu na October 2021 el a cumpra un arma pasobra el a wordo menaza door di un persona cu tabata den auto hunto cu e rumannan W. E ta haya cu J.K.L. mester a bay Polis haci denuncia y no bay cumpra un arma. Na opinion di Fiscal, J.K.L. no tin ningun derecho pa a tira riba e ruman di J.W.

Fiscal a remarca cu ta promer biaha J.K.L ta bisa cu e ruman di J.W. kier a dal’e cu un boter. Na opinion di Fiscal, no tin ningun testigo cu ta confirma esey. J.K.L. ta bisa cu no tabata su intension di herida e ruman di J.W. Fiscal ta haya cu J.K.L. a tuma risico pa mata e ruman di J.W. Riba un distancia hopi cortico, J.K.L., kende no tin conocemento di arma, a tira riba ruman di W. Fiscal a mustra riba un sentencia di Corte Supremo di 2021 cu ta mustra cu esaki ta intento di mata. Fiscal a sigui bisa cu no a haya e arma cu J.K.L. a usa pero si a haya e bala cu a saca for di nek di e ruman di W.

Fiscal a bisa cu pa tin un arma di candela ta sumamente peligroso. Dos cos so por haci cu un arma, menaza of tira. J.K.L. tin suerte cu e ruman di W. no a fayece. Tambe e tin suerte cu mas hende no a resulta herida door di e tiro. Fiscal ta haya cu J.K.L. mes a dicidi di tuma ley den man.

Fiscal a expresa cu mester evita cu Aruba ta bira un Wild Wild West. Esey ta perhudica turismo di Aruba.

Fiscal a exigi 5 aña di prison pa J.K.L. Pa loke ta e demanda di daño, el a pidi Hues pa declara esaki no admisibel pasobra no tin claridad si AZV ta cubri gasto. Si resulta despues cu AZV no ta cubri e gastonan, ta keda W. tog e oportunidad di cuminsa un caso civil.

DEFENSA PROPIO

Abogado mr. Mohamed ta haya cu mester declara J.K.L. liber pa defensa propio. E abogado a mustra cu door di menaza di e grupo di J.W., J.K.L. a busca un arma. El a mustra cu no ta J.W., kende lo a menaza di lo bringa cu J.K.L. sino e ruman homber a bay habri e porta di auto di J.K.L.  E momento ey J.K.L. a spanta pasobra el a mira e ruman cu un boter den man. El a coy arma y tira di biaha. E amiga di J.K.L. cu tabata den auto, a declara na Polis cu el a mira e ruman nomber di W. cu algo den su man. Na opinion di mr. Mohamed, J.K.L. no tabatin chens di haci nada otro. Esey a base di ley ta wordo considera actua den defensa propio. El a bisa Hues cu ningun hende sa kico realmente e ruman su intension tabata pa bay habri e porta di auto. Henter anochi e no a mete den e problema y diripiente el a bay habri e porta di auto. J.K.L. den fraccion di seconde a actua pa un situacion di sorpresa cu a presenta. E no a spera mes cu e ruman lo bay habri e porta di auto, den cual e tabata pa bay for di e lugar. Den su spanto el a tira. For di October 2021 e grupo di W. tabata menaza J.K.L. E abogado a bisa cu J.K.L. ta arrepenti di loke el a haci. E ta comparti punto di bista di Fiscal pa cu e demanda di daño.

REACCION FISCAL

Fiscal a reacciona cu mester rechaza defensa propio. Ningun testigo a confirma cu e ruman homber kier a dal J.K.L. cu boter. E amiga di J.K.L. a bisa cu el a mira cu e ruman tabatin algo den man pero no sa ta kico. E ta haya cu mester rechaza peticion di defensa propio.

Segun J.K.L. tin bisa cu tin placa pone riba su cabez.

Hues a sera tratamento di e caso y a bisa cu 22 September 2022 lo tin sentencia. 8.15 di mainta.