ORANJESTAD: Diabierna ultimo na Marina Pirata di famia Donker, na unda cu sr. Ricky Donker tambe a wordo reconoci, a tuma luga un anochi dedica na e atletanan cu a forma parti di seleccion di Aruba y a titula campeon Latino Americano Senior Division na aña 1981 na Puerto Rico. Como tambe campeon Latino Americano Senior Division na 1982 na Sint Maarten. Dos biaha nos seleccion a titula campeon y na dos ocasion a representa Aruba den Serie Mundial cu a tuma luga na Gary Indiana na Merca.
Durante e ceremonia na honor di e atletanan Minister Endy Croes a hiba un palabra unda cu e la expresa cu esaki ta un ehempel di e forsa di deporte cu ta conecta nos cu otro y mas cu claro. E mandatario a agrega cu ora a wordo acerca pa sr. Buty Tromp, sr. Haime Wiersma, sr. Rafa Plaza, sr. Fle Giel y sr. Eugene Leañez pa e proyecto aki, a duna un sosten na esaki. Deporte ta crea amistad, ta pone nos hunto awe 41 aña despues y ainda tin un amistad. E mandatario a sigui bisa cu recientemente e tabata na un otro evento unda cu Gobernador di Sint Maarten sr. Holiday a bin Aruba pa despedi despues di 12 aña fungi como Gobernador. Den discurso di sr. Holiday durante e acto ceremonial e la trece cu e ta un hungado di baseball y e la conta un poco di su bida unda cu na aña 1978 e la hunga cu seleccion di Sint Maarten na Aruba. E tempo ey nan no a topa Aruba den e rondanan. Pero a invita Aruba pa bin Sint Maarten loke Aruba a haci tambe despues di Gary Indiana. Sr. Holiday tabata conta su storia cu asina un pasion cu e la menciona dos nomber di sr. Willy Gomes (q.e.p.d.) y sr. Guillermo Raymond. Despues e mandatario di enseñansa a acerca sr. Holiday pa puntre dicon e la menciona e dos nombernan aki. Sr. Holiday a expresa cu e ta corda con na 1978 ora seleccion di Aruba a bin Sint Maarten e wega tabata preta y e seleccion di Sint Maarten a perde den e ultimo inning. Sr. Holiday a picha den e wega ey unda cu sr. Willy Gomes (q.e.p.d.) a dal un homerun pa Aruba a gana e wega. Y sr. Guillermo Raymond a dale un dobleta y pone Aruba dilanti. Minister Endy Croes a sigui bisa eynan bo wak con un hungado di baseball a bira gobernador di un pais. Deporte ta trece amistad, deporte ta crea excelencia y deporte ta e vehiculo cu ta crea nos tur como miho ciudadanonan pa nos pais.
E mandatario a sigui bisa cu ta momentonan bunita ora bo bini hunto y mira e poder cu deporte por tin no solamente pa siña bo disciplina, siña bo caracter, siña bo competi y celebra ora logra titulonan. Pero 41 aña despues ainda por conecta nos bek cu otro den un forma asina. Danki na sr. Buty Tromp, sr. Fle Giel, sr. Haime Wiersma, sr. Rafa Plaza y sr. Eugene Leañez cu a inicia e idea aki. Minister Endy Croes a enfatisa; mi ta kere hopi den deporte y mescos cu bosonan deporte ta core den mi bena. Mi a priminti cu nan por conta cu e di Ministerio di Deporte pa un evento asina. Ta un honor pa por honra boso un biaha mas, boso a trece hopi alegria 41 aña pasa na esnan cu a biba esaki e tempo ey. Pero awenochi nos ta recorda boso un biaha mas riba esaki cu un reconocemento. Pabien den nomber di Gobierno di Aruba, pabien den nomber di Minister di Enseñansa y Deporte.
Seleccion ganado di Latino Americano Sr. Division 1981 na Puerto Rico:
Sr. Orvin Gonzales, sr. Haime Wiersma, sr. Richard Brokke, sr. Eugene Leañez, sr.Rafael Plaza, sr. Junior Peterson, sr. Sandy Bislip, sr. Franklin Giel, sr. Mark Amoroso, sr.Alfredo Ruiz, sr. Andres Andrews, sr. Leonardo Geerman, sr. Roberto Miljard y sr. Nelson Martis (q.e.p.d).
Coach: Rudy Wester
Manager: Karel Williams
Seleccion ganado di Latino Americano Sr. Division 1982 na Sint Maarten:
Sr. Alvin Buty Tromp, sr. Haime Wiersma, sr. Ricky Donker, sr. Milton Croes, sr. Rafael Plaza, sr. Johny Paesch, sr. Arthur Chali Correa, sr. Franklin Danies, sr. Erick Thiel, sr. Victor Vrolijk, sr. Remigio Mademilia, sr. Robert Lieveld, sr. Roberto Miljard y sr. Ricky Kingsale
Coach: Rudy Wester
Manager: Karel Williams
Concluyendo e mandatario ta gradici e hungadonan pa nan contribucion den deporte y di a trece hopi alegria cu e titulonan cu nan a logra. Keda cu e mes un motivacion pa sigui inspira e chikitonan cu ta lanta pa asina nan tambe cana e mes un caminda cu boso a cana pa logra den bida y haci e pueblo orguyoso.
