Minister di Finansa durante conferencia di prensa: Gobierno ta presenta Cambio di Presupuesto 2022 na un forma mas acelera Ta reduci e deficit presupuestario di 227 pa 148 miyon florin

Durante conferencia di prensa, Minister Xiomara Maduro di Finansa a splica cu Gobierno ta bay presenta un Cambio di Presupuesto 2022 na un manera mas acelera. Esaki pa por caba di atende cu e critica di CAFT y tambe cu e menasa di un instruccion den forma di un Koninklijk Besluit KB. E deficit presupuestario ta wordo reduci cu 79 miyon di 227 pa 148 miyon florin. E siman aki Parlamento ta ricibi un Nota di fin di aña cu ta contene e cambionan proponi pa Presupuesto 2022.

Cambio di Presupuesto ta un proceso normal
Minister Maduro ta splica cu un cambio di presupuesto ta un procedura normal dentro di e ciclo presupuestario cu ta tuma luga mas den fin di aña. Sinembargo e aña aki debi na e critica di CAFT y tambe e menasa pa un KB, Gobierno ta opta pa bay acelera e proceso di cambio di presupuesto di aña 2022.

Deficit lo baha di 227 pa 148 miyon florin
Na april 2022 Parlamento a aproba Presupuesto 2022 cu un deficit di 227 miyon. Cu e cambionan cu Gobierno lo presenta na Parlamento proximamente, e deficit lo baha di 227 pa 148 miyon. Minister Maduro ta indica cu ta trata aki di cambionan unda cu ta adapta entrada na, entre otro, e cifra nobo di crecemento economico di 8.8%. Banda di esaki gastonan di personal y di servicio y producto ta wordo baha ainda mas. Tur cambio lo hiba na baha e deficit cu 79 miyon florin.

Parlamento ta ricibi e Nota di fin di aña (Najaarsnota) cu e cambionan proponi
Minister Maduro ta informa cu e siman aki lo manda e Nota di fin di aña, e Najaarsnota, pa Parlamento di Aruba pa asina informa e organo legislativo riba e cambionan cu Gobierno ta propone pa Presupuesto 2022. E ley mes awor lo bay pa CAFT y Raad van Advies pa por haya nan conseho corespondiente pa despues Gobierno haci cambio of contesta preocupacionnan. Na momento cu e proceso aki keda cla, Gobierno lo entrega e concepto di Ley pa Cambio di Presupuesto 2022 na Parlamento.