Home Local Minister di Naturalesa: Centro di Control di Cacho cu proyecto piloto...

Minister di Naturalesa: Centro di Control di Cacho cu proyecto piloto di microchipping

SHARE

Na comienso di augustus Centro di Control di Cacho a anuncia extencion di orario di servicio mirando e desaroyo positivo. Cu e extencion di orario di CCC, ta duna mas oportunidad pa esnan cu kier adopta un mascota.

Durante ultimo siman Centro di Control di Cacho a cuminsa cu e proyecto piloto di microchipping unda cu ta spera di aporta na hisa e grado di adoptacion na Aruba. Ora adopta via Centro di Control di Cacho, tin rekesitonan cu e doño nobo mester tene na dje, un di nan ta cu nan mester chip y sterilisa e mascota adopta y tambe trece prueba cu esaki dentro di dos luna. Esaki ta pa percura cu e doño responsabilisa su mes adecuadamente pa nan mascota.

Sterilisando bo mascota ora e cria no ta desea y microchip bo mascota ta yuda cu e problematica di cacho (y pushi) riba caya. Esaki ta un di e meta nan cu Centro di Control di Cacho ta enfoka ariba. Na e momento nan aki e proyecto piloto ta enfoka riba e parti di microchip, y ta aplica pa e cachonan cu ta wordo adopta via Centro di Control di Cacho, na disponibilidad y evaluacion di veterinario di Gobierno. E programa piloto ta fungi tambe como fase di prueba pa e sistema di regsitracion digital cu ta den proceso pa wordo lansa y activa oficialmente.

E proyecto ainda ta den planificacion mirando cu ainda ta den proceso cu reunion cu stakeholders, veterinarionan y NGO’s. Gobierno di Aruba ta spera di por lansa esaki cu un campaña nacional den e lunanan binidero. Esaki lo wordo comunica via canalnan oficial di Gobierno di Aruba y tambe via Centro di Control di Cacho su pagina di Facebook.