ORANJESTAD – Aruba Airport Authority N.V. (AAA) su Wings of Hope (WoH) ta hasi entrega oficial di e proyecto “Waste Sustainably” na UNESCO Schools Aruba Consortium consistiendo di Colegio Hilario Angela, EduCampus, International School of Aruba y Prinses Amalia Basisschool como e ganador di e SDG School Champion Challenge 2022.
Como parti di WoH su meta di “Awareness”, UNESCO Schools Aruba Consortium a wordo anuncia como e ganador absoluto na juni di e SDG School Champion Challenge 2022 y a ricibi AWG 20,000.00 pa ehecuta nan “Waste Sustainably” plan, cu ta inclui e instalacion di diferente stacionnan pa recicla na cada un di e 4 scolnan di UNESCO Schools Aruba Consortium pa asina colecta carton, metal, plastic, glas y tambe desperdicio di compost organico. E studiantenan y staff lo participa den un workshop cu informacion con pa usa e stacionnan di recicla mas eficiente y con pa colecta, procesa y separa e desperdicio pa mantene e eficiencia total. Cada scol lo ricibi un raport tambe riba cuanto desperdicio a wordo colecta cu ta duna un indicacion cuanto desperdicio e scolnan a preveni pa bai na dump.
Cada scol lo tin nan mesun “Green Team” di studiantenan cu lo ta encarga cu e proyecto y cu lo comunica tur informacion cu otro studiantenan. Tur miembro di e “Green Team” lo ricibi training dor di Plastic Beach Party y Aruba Compost Club pa asina nan por bira future trainers pa otro miembronan cu lo forma parti di e “Green Team”, sigurando cu proyecto continuo involucandro hobennan. Studiantenan lo wordo encurasha pa aplica e mesun principionan na cas y tambe den comunidad.
Den presencia di AAA Wings of Hope, UNESCO Schools Aruba Consortium, Plastic Beach Party y Aruba Compost Club, a hasi entrega oficial di e stacionnan pa recicla. Cu e proyecto “Waste Sustainably”, UNESCO Schools Aruba Consortium conhuntamente cu Plastic Beach Party y Aruba Compost Club lo por colecta, procesa y separa desperdicio y lo ta un ehempel pa otro scolnan, organisacionann y e comunidad.
WoH lo sigui inclui studiantenan y e comunidad di Aruba den diferente proyectonan cu tin un impacto sostenibel pa e comunidad, crea concientizacion riba e 17 Sustainable Development Goals (SDGs) di Nacionnan Uni y alabes encurasha tur persona pa hasi cambionan cu ta crea un mihor futuro sostenibel.
