ORANJESTAD: Dialuna anochi Arubaanse Voetbal Bond (AVB) a haci entrega di diploma B-license di Concacaf na seis cursista cu a finalisa exitosamente nan curso. B-license ta un di e diplomanan di nivel mas halto otorga den Caribe na entrenadonan di futbol. Sigur esaki lo yuda pa engrandece e nivel di futbol den nos region. Cocacaf pa algun tempo caba ta exigi cu entrenadonan cu traha den e division mas halto di nan pais, mester tin por lo menos un B-license pa por competi den nan pais y den Caribe. Minister Endy Croes y presidente di AVB, sr. Randolf Lacle a haci entrega di e diploma na e seis cursitanan: sra. Milvienne Henriquez, sr. Fernando Tromp, sr. Lerjan Casares, sr. Emigene de Cuba y na Hulanda sr. Leo Garcia y sr. Patrick Dwarkasing. Minister Endy Croes ta felicita e entrenadonan cu a haya nan diploma di License B di Concacaf alabes ta gradicinan pa nan amor y dedicacion pa e deporte di futbol.
