ORANJESTAD – Durante un conferencia di prensa diabierna ultimo a anuncia un ahuste di tarifa di awa entrante 1 di augustus. E ahuste ta debi na un aumento drastico di Heavy Fuel Oil (HFO) di ±126%, compara cu aña 2021. Clientenan lo nota e ahuste di tarifa pa prome biaha den cuenta di awa di september 2022, cual ta caduca na october 2022. Cu medidanan interno pa baha gasto operacional y cu e aumento di tarifa, WEB lo por sigui cu su plan di inversion pa bira menos dependiente di HFO. Esaki ta encera entre otro, introduccion di gas natural como reemplasante di HFO y ampliacion di energia renovabel.
Medidanan interno di WEB
Te awor WEB a sa di absorba e aumento di gasto di HFO, cual WEB ta uza pa genera energia, door di aloca su reservanan. A yega na un punto cu esaki no ta responsabel mas. Pa modera e aumento di tarifa, caminda posibel, WEB a baha su otro gastonan operacional, (entre otro a vries salario di empleado pa 2022), caba cu ± Awg. 6.5 mion. Tambe WEB a acepta di genera menos entrada pa aña 2022.
Door di a tuma e medidanan y cu e aumento di tarifa aki, WEB lo por sigui garantisa stabilidad financiero pa por produci y suministra awa y energia den futuro. Cu esaki WEB lo por sigui cu su plan di inversion pa bira menos dependiente di HFO y baha emision di CO2.
Baha dependencia di HFO
Desde 2006 te cu awor WEB a bin ta hisa eficiencia den uzo di HFO di 6100 bari pa dia te na ± 3.300 bari pa dia, door di inverti den plantanan SWRO y RECIP. Tambe a introduci energia renovabel (biento y solo) pa asina baha e dependencia di HFO mas tanto ainda. Lo sigui inverti den proyectonan pa introduci gas natural (pa reemplasa HFO) y pa amplia e parti di energia renovabel. Actualmente 85% di e energia cu WEB ta uza pa su produccion, ta procedente di energia fosil (HFO) y 15% ta bini di energia renovabel. Segun WEB su strategia, lo kier logra pa 2024, un mix di 65% energia fosil y 35% renovabel. Finalmente e obhetivo pa 2030 ta pa logra un mix di 50% energia fosil y 50% energia renovabel. E mix di 50%-50% ta optimal pa un produccion y suministro confiabel, pagabel y sostenibel pa un isla manera Aruba.
No a tuma e decision di aumenta tarifa di un dia pa otro. Desde 2021 WEB a bin ta informa stakeholders y repetidamente a evalua e decision pa aumenta tarifa, consciente di e impacto cu esaki por tin riba comunidad y economia di Aruba. Mirando e rol vital di e compania di awa y energia pa nos isla, no ta responsabel mas pa sigui aloca reserva di compania pa absorba e gastonan halto di Heavy Fuel Oil. Reservanan di compania ta necesario pa den futuro por keda inverti pa por keda garantisa produccion di awa y energia, y distribucion di awa.
Tarifa entrante 1 augustus 2022
E tabelnan aki bou ta duna un bista di e structura di tarifa di antes y entrante 1 di augustus 2022.
Tarifa residencial (A)
Tarifa NO residencial (T,P,G,H,L)
E tarifa special pa Agricultura, Horticultura y Ganaderia (C) a keda Awg. 5.50 pa m3, basa riba compra minimo garantisa di 10 m3.
Clientenan lo nota e aumento di tarifa pa prome biaha den cuenta di awa di september 2022, cual ta caduca na october 2022. WEB ta hopi consciente cu un aumento di tarifa lo tin un impacto considerabel riba comunidad y economia di Aruba. Te cu awor WEB a logra absorba e aumentonan tumando medidanan cu impacto grandi riba su operacion. Mirando e desaroyo di aumento di HFO, no ta responsabel mas pa carga e peso aki. Pa e motibo aki WEB ta haya su mes obliga di tuma e decision pa aumenta tarifa. Mientrastanto WEB lo keda vigila desaroyo di prijs di HFO. WEB Aruba ta spera di por conta cu comprension di comunidad di Aruba.
