Brandweer a ricibi material di trabou nobo pa por sigui brinda asistencia na comunidad den forma digno y sigur
Resultado di empeño di Gabinete Wever – Croes I y II
ORANJESTAD – Prome Minister Evelyn Wever – Croes ta sumamente orguyoso di e desaroyonan cu Minister di Husticia Rocco Tjon a logra concretisa. Ta trata di diferente material di trabou nobo pa Dienst Brandweer Aruba, cu ta sumamente importante pa e departamento sigui eherce e tarea importante cu nan tin na un forma sigur.
Manera cu Minister Tjon a splica, Dienst Brandweer Aruba ta un departamento cu pa varios aña a conoce hopi reto. Retonan infrastructural, falta di material, necesidad di truck nobo, educacion y entrenamento di personal y mas. Tabata un reto grandi pero hunto cu Management Team y Sindicato di Brandweer SINBA y danki na e pasenshi di e personal, por bisa cu a logra.
Conseho di Minister a aproba e suma di 2.2 miyon florin cu tabata falta, pa asina por finalisa e compra di cuater truck pa Dienst Brandweer Aruba. Banda di esaki a percura pa e bomberonan haya “bluspakken” y uniform nobo (completo). Minister Tjon a anuncia tambe cu ta den proceso pa regla e posicion huridico di e trahadonan, y a haci palabracion cu companianan Mericano pa entrenamento necesario tuma luga na personal di Brandweer, cual pa hopi aña no tabata e caso.
Di e forma aki ta mira cu desde Gabinete Wever-Croes I y aworaki, a continua cu esaki den Gabinete Wever-Croes II, ta sigui traha riba tur aspecto di mehoracion di Dienst Brandweer Aruba. Prome Minister ta felicita Minister Tjon y Dienst Brandweer cu e logro aki, sin lubida e empleadonan cu tabatin pasenshi durante tur e añanan aki.
