“A mira autonan core bay cu varios hende aden y a pensa cu ta un atraco, luga e hendenan aki tawata alehando di e sitio ora a mira candela”
Caya Ritmo
Eagle: diaranson den careda di 11 or y 40 a drenta un informacion cu un atraco lo a caba di tuma lugar na Citgo Sasaki. Mesora polis a manda un patruya na e sitio pero na yegada nan a topa cu e lugar scur y tawata mira candela.
Na e sitio e prome truck di brandweer a pidi pa refuerso di un truck di brandweer mas.
Hopi lihe a cuminsa evacua tur hende cu tabata cerca di e gas station. Polis a ponenan bay para basta leu, mirando e peligernan di candela, cerca di tankinan gasolin cu ta situa banda di panort. E tankinan ta bou tera cerca di unda ta yena tire.
Hopi lihe brandweer a logra domina e candela pa e no sigui expande.
Kiko ta pensa cu por a pasa
E candela mes a cuminsa panort di Optica. Tin hanchi unda ta warda cos despues sigui bay nort bo ta haya e otro establecimientonan.
Na e sitio un fuente cu ta bon na altura a conta cu ta e kashi coriente mayor a pega candela, y esaki por a ser ocasiona pa posibel awa cu a bay den kashi.
Por a mira cu e kashi a wordo destrui por completo door di e candela.
Den e caso aki Elmar tawata e instancia mas importante pa a corta e coriente mesora.
Den dia lo por tin miho bista cuanto daño e esaki a causa, ya a wordo bisa caba cu ta un trabou grandi pa bay drecha esaki y sin laga afo cu lo costa miles di florin.
Pues tanten cu e kashi coriente grandi aki no wordo drecha ningun establecimiento lo no por habri, debi cu no tin coriente.
Mayoria di e doñonan di e negoshinan situa eynan a yega pa pone nan mes na altura di locual a sosode.
