Den Haag – Arubahuis ta den pleno preparacion pa e binimento di e grupo di studiantenan na luna di augustus benidero. Den cuadro di esaki Arubahuis a ricibi diferente signal for di e mentornan cu hopi studiante cu ta biniendo Hulanda te ainda NO tin camber of vivienda regla. Tambe cu un cantidad grandi di studiante no a inscribe na tempo pa un vivienda.
E situacion aki ta preocupante pa Arubahuis y e mentornan. Dicon? Pasobra semper Arubahuis a bisa cu e question di busca camber ta keda un responsabilidad di e studiante y di nan mayornan. ‘Nos como Arubahuis y e mentornan semper a purba na informa e studiantenan mas amplio posibel riba e tema aki. Ta bou situacionnan sumamente extraordinario Arubahuis por haci un apelacion na e Hogeschool, Universidadnan y cooperacion di vivienda pa entermedia. Pero Arubahuis mes no por regla of garantisa vivienda,’ asina directora a.i. di Arubahuis drs. Glenda Hernandez a bisa.
Segun sra. Hernandez semper Arubahuis a enfatisa e importancia pa tempran cuminsa orienta riba vivienda como studiante, mirando e scarsedad na camber of vivienda pa studiante den diferente region na Hulanda. Ta pesey riba e website di Departamento di Enseñansa tin un pagina totalmente dedica na e tema aki. Sra Hernandez: ‘Pa logra haya un camber of cas na e momentonan aki ta sumamente dificil, mirando cu e guera na Oekraina a ocasiona un fluho grandi di refugiado cu tambe mester un dak riba nan cabes. Hopi gemeente ta duna preferencia na refugiadonan for di Oekraina. Tambe gemeentenan ta controla severo riba huurmento di camber sin permiso. Y no ta tur doño di cas ta haya permiso pa huur un camber cu studiante, cu e consequencia cu e cantidad di cambernan ta sumamente scars.’
Arubahuis lo informa tur studiante cu ta biniendo Hulanda pa medio di un carta riba e situacion precario cu camber pa e motibo cu sin un adres fiho na Hulanda e studiante NO por inscribe su mes na un gemeente; no por haya un BSN (Burger Service Nummer) nummer y sin e BSN nummer e studiante no por habri un cuenta di banco y regla su otro asuntonan pa cu su estudio. Segun señora Hernandez esaki lo por nifica un mal comienso di nan estudio y lo trece hopi stress cune. ‘Si tene na cuenta e puntonan menciona ariba, nos conseho urgente ta pa anula bo binimento na Hulanda te ora cu bo tin perspectiva riba un adres fiho. Bin Hulanda sin un camber of adres fiho ta un gran risico pa bo mes y pa otronan. Si bo chens riba un camber e aña aki ta chikito, anto nos ta conseha pa haci tur e areglonan posibel pa otro aña bo por bin mihor prepara Hulanda. Pa e studiantenan cu ta pensando pa bin Hulanda na 2023, un suplica grandi pa cuminsa inscribi pa un camber of vivienda desde awor!’ segun declaracion di director a.i. di Arubahuis Glenda Hernandez.
Por ultimo señora Hernandez a bisa cu na tur momento studiantenan cu tin pregunta por haci esaki na e departamento di Enseñansa di Arubahuis of na un di e mentornan.
Nota pa redaccion: E potret ta cortesia di Arubahuis